Kanë kaluar pesë ditë që kur kryesuesja e Bordit të Ri të Telekomit, Besa Shatri-Berisha ka kërkuar para nga Qeveria e Kosovës duke alarmuar se borxhi i kësaj ndërmarrje publike ka arritur në 60 milionë euro.
Besa Shatri-Berisha, në raportimin e saj para kabinetit qeveritar, ka thënë se kjo ndërmarrje publike gjendet në krizë financiare.
“Nëse nuk intervenohet shpejt, Telekomi falimenton shpejt, sepse borxhet janë të mëdha”, ka thënë Shatri-Berisha.
Por ajo nuk ka treguar për çfarë borxhe bëhet fjalë.
Insajderi ka kërkuar të dijë nga kjo Ndërmarrje Publike, se sa në të vërtetë është borxhi total që ka Telekomi dhe se si është arritur shuma prej 60 milionëve. Por ende nuk ka marrë ndonjë përgjigje rreth kësaj çështjeje.
Gjithashtu u raportua se në kërkesën që ky bord i ka bërë qeverisë ka specifikuar një borxh që i ka vetë asaj.
Arkës së shtetit për t’i paguar borxhet ndaj furnitorëve i është llogaritur edhe shuma prej rreth 15 milionë eurosh që Ministria e Financave i kishte kërkuar Telekomit si dividendë për vitin 2017.
Kryesuesja e Bordit të Telekomit, Besa Shatri-Berisha gjatë raportimit të hënën para kabinetit Qeveritarë tha se totalin e 60 milionëshit përfshihej edhe shlyerja e borxhit prej 26 milionë eurove ndaj kompanisë Z-Mobile.
Gjykata e Arbitrazhit në Londër kishte gjobitur me 32 milionë euro Telekomin e Kosovës, lidhur me kontestin gjyqësor lidhur me marrëveshjen e vitit 2008.
Por, për këtë “borxh” vitin e kaluar u arrit një marrëveshje. Në muajin maj të vitit 2017 ish-drejtori menaxhues i Telekomit dhe Agron Mustafa dhe përfaqësuesi i kompanisë Z-mobile Blerim Devolli, kishin bërë kontratë të re.
Përmes saj Z-mobile hiqte dorë nga 32 milionë eurot, me kusht që Telekomi të paguajë vetëm shpenzimet gjyqësore, Z-Mobile do të marrë në shfrytëzim nga Vala edhe 100 mijë numra të rinj, si dhe shërbimin 3 dhe 4 G.
Qeveria nuk do t`i shlyej borxhet
Haki Shatri, këshilltar i kryeministrit Ramush Haradinaj, ka deklaruar se janë në fazën fillestare të vlerësimit të situatës në Telekom. Sipas tij, pas vlerësimit të gjendjes do të merren masa.
“Duhet të gjenden përgjegjësit që e kanë shkaktuar këtë situatë, duhet ta analizojmë situatën, çfarë mund të bëhet që gradualisht me anë të forcave të veta dhe me përkrahje ta ringjallim Telekomin”, tha për Telegrafin, Shatri.
Sipas tij, nuk duhet të lihet falimentimi i Telekomit të Kosovës.
“Sot është herët të thuhet se çfarë masa duhet të merren, por janë duke u përpunuar ato të dhëna. Ne nuk jemi që të mbyllet ajo, nëse ka ndonjë mundësie ndalese, ne jemi për ta mbështetur Telekomin që të vazhdoj punën, sepse aty janë disa mijëra të punësuar dhe shërbimet që na ofrohen nga ajo”, tha ai.
Ndërsa Ministri Zhvillimit Ekonomik, Valdrin Lluka, ka thënë se pavarësisht faktit se aksionar i kësaj kompanie është Qeveria e Kosovës, borxhet nuk do t’i shlyej. Ai thotë se Telekomi ka potencial për të qenë fitimprurës në treg, por nuk është menaxhuar në mënyrë të duhur.
“Tashmë duhet të shikohen format si qeveri, do të mblidhemi dhe të diskutojmë se si të rimëkëmbim Telekomin, si të kthejmë në kompani profitabile, të ulim kostot operative, sepse këto kosto janë shumë të mëdha. Normalisht t’i shikojmë trendet, sepse një ndërmarrjeje që i ulet shitja dhe i rriten shpenzimet në të njëjtën kohë nuk është normale në asnjë biznes në botë”, ka thënë Lluka. /Insajderi.com
