Thaçi në Hagë: I hedh poshtë të gjitha akuzat kundër meje

"Akuza është krejt e paqëndrueshme dhe deklarohem i pafajshëm plotësisht”, pohoi Thaçi.

Ish-presidenti i Kosovës vetëm deri para pak ditësh, Hashim Thaçi, është paraqitur në seancën e parë në Dhomat e Specializuara në Hagë, njofton Insajderi.

Ai ka deklaruar shkurt se “i hedh poshtë të gjitha akuzat për të cilat akuzohem”, kur është pyetur nga gjyqtari nëse i ka lexuar dhe kuptuar ato.

“Akuza është krejt e paqëndrueshme dhe deklarohem i pafajshëm plotësisht”, pohoi Thaçi.

Ai u pyet nga gjyqtari përsëri, nëse i pafajshëm deklarohet për të gjitha pikat.

“Ritheksoj, akuza është e paqëndrueshme, deklarohem i pafajshëm për të gjitha pikat e akuzës si të paqëndrueshme”.

Në aktakuzën e konfirmuar prokurori special akuzon Thaçin për “përndjekje, burgosje, ndalim arbitrar, akte të tjera çnjerëzore, trajtim mizor, torturë, vrasje, vrasje e paligjshme dhe zhdukje me forcë e personave, të gjitha këto krime lufte dhe krime kundër njerëzimit”.

Krimet e supozuara thuhet se janë bërë “midis prillit 1998 dhe gushtit 1999 në Kosovë e Shqipëri Veriore”.

Ato thuhet se u bënë “kundër popullatës civile”.

“Këto krime kishin në shënjestër kundërshtarë të cilët perceptoheshin se kishin bashkëpunuar apo kishin lidhje me zyrtarë apo institucionet ish-jugosllave”, tha prokurori në fjalën e tij.

Prokurori shtoi se “krimet u kryen kundër personave që nuk merrni pjesë në konfliktin e armatosur”.

Sipas prokurorit të rastit “ekziston dyshim i bazuar mirë se Hashim Thaçi, ka kryer këto krime si anëtar i ndërmarrjes kriminale të përbashkët”.

Avokati i Thaçit pyet në Gjykatë: Ku janë pretendimet për vjedhje organesh dhe historia e asaj Shtëpisë së Verdhë? – Thaçi e dinte se janë gjepura

Avokati i Hashim Thaçit, David Hooper, e ka pyetur prokurorinë në Gjykatën Speciale se ku janë ato akuzat për vjedhje organesh dhe akuzat për Shtëpinë e Verdhë në Shqipëri, të cilat edhe ishin nxitja fillestare për krijimin e Gjykatës Speciale, njofton Insajderi.

Përse, ka pyetur Hooper prokurorinë, nuk gjinden ato askund në aktakuzë?

“Thaçi, e kundërshton të gjithë narrativen që është paraqitur nga prokuroria. Megjithëse është tejet e redaktuar dhe nuk është aq informues dhe treguese për ne si mbrojtje, sa do të ishte nëse do të ishte paçensur, por kur e shikojmë aktakuzën ne themi këtë ‘ku janë pretendimet për vjedhjen e organeve njerëzore dhe historia e shtëpisë së verdhë e cila ishte kaq e rëndësishme në nxitjen për krijimin e kësaj gjykate?”, ka pyetur Hooper.

“Asgjë në aktakuzë nuk flet për vjedhje organesh”, pohoi avokati, duket shtuar më tej se “këtu (në gjykatë) nuk ka asgjë nga Kosova, s’ka asnjë emblemë. Nëse është e Kosovës (gjykata) do të duhej të kishim shqiponjën e zezë me të kuqe”.

Avokati më pas ka pohuar se sa u përket akuzave ndaj tij “Thaçi e dinte se këto pretendime ishin gjepura, prandaj ai ndihmoi në formimin e kësaj gjykate”.

“Thaçi ishte si mamia në lindjen e kësaj gjykate”.

Më pas avokati ka folur edhe për të arriturat e Thaçit, duke lexuar disa paragrafë edhe nga një libër i senatorit amerikan, Robert Dole.

“Hashim Thaçi doli në këtë luftë si zëri i arsyes dhe e çoi vendin drejt pavarësisë”, thuhet në librin e Dole.

Avokati ka kërkuar lirimin e menjëhershëm të Thaçit./Insajderi.com