Ministria e Tregtisë dhe Industrisë ka ftuar prodhuesit vendorë që të marrin masa të menjëhershme për të rritur cilësinë e produkteve për të përfituar në treg, pas rritjes në 100 për qind të taksës për mallrat e importuara nga Serbia dhe Bosnja.
Në një konferencë për media pas këtij vendimi, ministri i Tregtisë, Endrit Shala, ka thënë se prodhuesit vendorë, importuesit dhe tregtarët duhet të bashkohen në kauzën për zhvillim ekonomik të vendit.
“Qytetarë, prodhues, importues e tregtarë ju ftoj të gjithëve t’i bashkohemi kauzës për zhvillim të vendit e mirëqenie të popullit. Kërkoj nga prodhuesit të fokusohen më shumë në cilësi. Të arrini standardin dhe cilësinë më të lartë në mënyrë që qytetari i Kosovës të mos ketë mëdyshje për konsum ditor e të konsumojë prodhime vendore. Të bashkohemi të gjithë e të gjejmë zgjidhje kreative. Të gjejmë vende tjera për të importuar në Kosovë. S’është vetëm Serbia e Bosnja në këtë rajon”, ka thënë ai.
MTI ka thënë se masa prej 100 për qind rritje në taksën për mallrat e importuara nga Serbia vjen për të mbrojtur vendin.
“Unë e kam kryer detyrën time me këtë rast. Po i kryej detyrat e mija si ministër. Në kompetenca të mija si ministër dhe pas analizave të departamenteve përkatëse kemi propozuar këtë masë dhe kjo masë u mor në mbrojtje të ekonomisë së vendit e mbi të gjitha në mbrojtjen e sigurisë kombëtare të vendit tonë”, ka shtuar Shala.
Shala ka thënë se nga sot të gjitha agjencionet janë obliguar që të ndalohet importimi i çdo produkti që nuk e ka etiketën me emërtim Republika e Kosovës.
Ai ka thënë se kjo masë nuk do të kthehet deri sa Serbia dhe Bosnja ta trajtojnë Kosovën si shtet.
Për rritjen e çmimit të bukës pas taksës fillestare prej 10 për qind, Shala ka thënë se kanë informacione se çmimi është rritur me marrëveshje të tregtarëve.
“Sa i kam informacionet, rritja e grurit ishte edhe para se të merrej masa. Kjo s’është si pasojë e masës, por edhe për shkak të rritjes së çmimit të grurit në berzë. Kam angazhuar inspektoratin e tregut që në bashkëpunim me të gjitha inspektoratet të monitorojnë dhe të evidentojnë çdo rritje apo çdo tentim rritje që është e paarsyeshme. Kërkoj nga agjenconi kosovar i konkurrencës sepse rritja e çmimit të bukës ka pas informacione se është bërë me marrëveshje mes kompanive dhe autoritet për hetimin e masa për këtë është Agjencioni Kosovar i konkurrencës”, ka shtuar Shala.
