Sami Lushtaku, anëtari i kryesisë së Partisë Demokratike të Kosovës iu është kundërpërgjigjur zyrtarëve të Vetëvendosjes, të cilët së fundmi kanë paralajmëruar luftë vëllavrasëse në Kosovë, shkruan Insajderi.
Sipas tij, anëtarët e VV-së s’kanë guxuar që t’i dalin përballë armikut kur është kërkuar prej tyre, e tani ai është shprehur se nuk beson që e kanë guximin që t’i dalin përballë shtetit dhe popullit të Kosovës
“Kushdo që është aq i çmendur, do ta marrë përgjigjen që e meriton”, ka thënë ai.
Shkrimi i plotë i Lushtakut:
Këto ditë, shumë anëtarë e mbështetës të LVV-së kanë bërë thirrje për dhunë e anarki, deri te vëllavrasja e lufta civile. Po habitem se si mbi 20 vjet pas çlirimit të vendit, njerëz që s’kanë dhënë asnjë kontribut për vendin, kanë guxim për të bërë thirrje të tilla.
Këta që s’kanë guxuar që t’i dalin përballë armikut kur është kërkuar prej tyre, s’besoj që e kanë guximin që t’i dalin përballë shtetit dhe popullit të Kosovës. Kushdo që është aq i çmendur, do ta marrë përgjigjen që e meriton.
Liria jonë është më e vlefshme se cilido individ dhe ata që mendojnë se do ta rrezikojnë popullin me nxitje për dhunë, le ta dinë se dhuna do t’i dënojë vet ata. Kush luan me zjarr, do të digjet vet prej tij.
