Deputeti i Kuvendit të Kosovës nga radhët e Lëvizjes Vetëvendosje, Fitim Uka, ka reaguar ndaj ngjarjes që ndodhi ditë më parë, kur disa nxënëse nuk u lejuan të regjistrohen në njërën nga shkollat e mesme në Kosovë, me arsyetimin se kishin shami mbi kokë.
Uka ka thënë në një vend ku kualiteti i arsimit ka prekur fundin, dikush ka zgjedh të merret me mbulesën e nxënësve.
Përmes një postimi në Facebook, ai është shprehur se Kosova është një vend ku poshtërohemi në testet e PISA-s, lexohet pak e kuptohet edhe më pak.
“Por, në vend të adresimit të këtyre problemeve, dikush paska zgjedhur që të merret me mbulesën dhe të shkel me të dyja këmbët në të drejtat e vajzave në Kosovë.
Pra, më e rëndësishme na qenka çfarë ke mbi kokë se sa në kokë! Kjo është thjeshtë e turpshme dhe e papranueshme”,ka shkruar Uka.
Postimi i plotë i tij:
Kualiteti i arsimit në Kosovë ka prekur fundin,
poshtërohemi në testet e PISA-s,
lexohet pak e kuptohet edhe më pak,
përdoren metoda të vjetra e mësohet përmendësh,
nxënësit etiketohen dhe ngacmohen,
dhuna e rrethon shkollën.
Por, në vend të adresimit të këtyre problemeve, dikush paska zgjedhur që të merret me mbulesën dhe të shkel me të dyja këmbët në të drejtat e vajzave në Kosovë.
Pra, më e rëndësishme na qenka çfarë ke mbi kokë se sa në kokë!
Kjo është thjeshtë e turpshme dhe e papranueshme. /Insajderi.com
