Pas një viti pauzë, sot pritet që më në fund në Gjykatën e Prishtinës të vazhdojë procesi gjyqësor në gjykimin ndaj Ukë Rugovës nën dyshimet se ishte pjesë e një grupi që furnizonin individë me viza Schengen të BE-së nga Ambasada italiane në Prishtinë, të cilat janë marrë në mënyrë të paligjshme ose përmes korrupsionit
Kur kanë kaluar më shumë se një vit qëkur është mbajtur seanca e fundit ndaj Ukë Rugovës, Gjykata Themelore e Prishtinës më në fund ka caktuar seancën e këtij gjykimi.
Që nga koha kur EULEX-i e ka përfunduar mandatin në Kosovë dhe pasi që lënda është transferuar te gjyqtarët vendorë nuk është mbajtur asnjë seancë gjyqësore.
Më 30 janar të vitit të kaluar, EULEX-i kishte hequr dorë nga gjykimi i këtij rasti, duke e transferuar atë te vendorët.
Sipas aktakuzës së përpiluar nga Prokuroria Speciale, Ukë Rugova ishte pjesë e një grupi qëllimi i të cilit ishte përfitimi material, duke furnizuar individë me viza Schengen të BE-së nga Ambasada italiane në Prishtinë, të cilat janë marrë në mënyrë të paligjshme ose përmes korrupsionit.
Sipas aktakuzës plot 556 viza Schengen ishin marrë nga Ambasada e Italisë në Prishtinë në lidhje me aktivitetet e grupit.
Së bashku më Ukë Rugovën në këtë rast janë të akuzuar edhe 20 persona të tjerë, ndër ta edhe ish-ministri Astrit Haraqija.
Të akuzuarit e këtij rasti janë deklaruar të pafajshëm duke mohuar pretendimet e Prokurorisë.
Insajderi kishte raportuar se Rugova ka shfrytëzuar emrin e babit të tij për të zhvilluar aktivitetin e tij kriminal, duke pajisur njerëz me pasaporta italiane në mënyrë të paligjshme dhe përmes korrupsionit.
InDoks kishte përgatitur një dokumentar që hedh vështrim mbi mashtrimin me viza italiane të Ukë Rugovë dhe grupit të tij.
Për ta shikuar dokumentarin klikoni KETU.
