Lëvizja Vetëvendosje ende nuk ka asnjë përgjigje rreth ofertës së djeshme që Lidhja Demokratike e Kosovës i dërgoi.
Zëdhënësi për media nga VV, Arlind Manxhuka në një prononcim për Insajderin tha se ende nuk ka asgjë rreth përgjigjes së ofertës së LDK-së.
Tutje, Manxhuka tha se qëndrojmë me të njëjtin mendim sikurse anëtari i tyre, Liburn Aliu.
Në mëngjes anëtari i VV-së, Liburn Aliu, tha se nuk është në dijeni që do të ketë një takim, mirëpo ai konfirmoi se shumë shpejt do të ketë një përgjigje nga partia e tij për LDK-në.
“Nuk e di a do të ketë takim. Ofertën e kemi marrë, por cila do të jetë përgjigja unë nuk jam momentalisht në Prishtinë dhe nuk e di, por besoj se do të ketë shumë shpejt një përgjigje”, tha shkurt për Insajderin, Liburn Aliu.
Kujtojmë, se LDK dje ka dorëzuar me shkrim ofertën për bashkëqeverisje me VV-në, të propozuar në takimin e datës 8 janar 2020.