Një aksident trafiku jo i zakonshëm, ka ndodhur gjatë mbrëmjes së djeshme në Prizren, ku dy vetura janë përplasur me njëra tjetrën, por i përfshirë ishte vetëm një shofer.
Rasti ka ndodhur rreth orës 21:00, në rrugën “Adem Jashari”, të kësaj komune, ku një vozitës nga pakujdesia nuk ka marrë masat e sigurimit derisa ka parkuar automjetin dhe si pasojë e kësaj, ka ardhur deri te aksidentimi me automjetin i cili ishte duke lëvizur.
Lidhur me këtë rast, zëdhënësi i policisë për rajonin e Prizrenit, Shaban Osmanollaj, në një përgjigje për Insajderi.com, ka thënë se në këtë aksident janë shkaktuar vetëm dëme materiale dhe nuk ka persona të lënduar.
“Rasti ka ndodhur rreth orës 20:47, në rrugën ‘Adem Jashari’ në Prizren, ku një vozitës nga pakujdesia pasi e ka parkuar automjetin e tij, duke mos i marrë masat e sigurimit, automjeti ka lëvizur duke e goditur automjetin tjetër, me ç’rast ka shkaktuar vetëm dëme materiale. Nuk ka persona të lënduar”, ka thënë Osmanollaj.
Në mbrëmjen e djeshme kanë qarkulluar pamje nga ky rast, ku është parë se nga pakujdesia e një shoferi, automjeti është parë në komunikacion pa ngasës, duke rrezikuar kështu edhe pjesëmarrësit e tjerë, e madje shkaktoi dëme te vetura tjetër me të cilën u përplas. /Insajderi.com/