Viti i ri akademik në Universitetet Publike të Kosovës do të fillojë në formë të kombinuar, në atë virtuale dhe fizike, njofton Insajderi.
Kështu është bërë e ditur pas konferencës së Rektorëve të Universiteteve Publike të vendin, në mbledhjen e mbajtur më datë 14 gusht, ku u shqyrtua procesi i fillimit të vitit të ri akademik 2020/21, në situatën e vazhdueshme të pandemisë COVID-19.
Në këtë konferencë u theksua gatishmëria e të gjitha universiteteve publike të Kosovës, që vitin akademik ta fillojnë me kohë, më 1 tetor.
Për shkak të ruajtjes së shëndetit publik, viti akademik do të fillojë në formë të kombinuar në formën virtuale dhe fizike.
Disa nga aktivitetet e procesit mësimor do të vazhdojnë të bëhen në formën fizike, si provimi pranues për studentët e ri, provimet dhe në të gjitha rastet universitetet publike do të respektojnë masat antiCovid-19.
Ndërsa disa aktivitete të tjera, si ligjërata, konsultime, punime seminari etj. do të vazhdohen në formatin online.
Konferenca e Rektorëve konstaton se si rrjedhojë e shtyrjes së Provimit të Maturës për 29 gusht, studentët e vitit të parë do të pranohen me vonesë dhe mësimi për ta do të fillojë me një vonesë deri në dy muaj.
Pavarësisht nga kjo, Konferenca e Rektorëve angazhohet që semestri për këta studentë të jetë i plotë dhe pa asnjë dëmtim të rrjedhës normale të procesit mësimor. /Insajderi.com
