Ministri i Shëndetësisë, Arben Vitia, ka shprehur ngushëllime për vdekjen e gruas shtatzënë nga Gjakove, si pasoj e komplikimeve nga virusi Covid-19, shkruan Insajderi.
Vitia ka thënë se nuk ka fjalë ajo qfarë ndjejnë stafi mjekësor dhe ata, për këtë humbje.
Me këtë rast, ministri Vitia u ka bërë thirrje qytetarëve që të qëndrojnë në shtëpi dhe t’i zbatojnë rregullat në mënyrë që ta kalojnë këtë pandemi sa më lehtë.
Statusi i plotë i ministrit Vitia:
Sot morëm njoftimin e rëndë për humbjen e jetës së bashkëqytetares sonë. Ajo priste të bëhej nënë. Komplikimet nga Covid-19 ia prenë jetën dhe ëndrrën në mes.
Marrim pjesë në këtë dhimbje të dyfishtë të familjes e miqve!
Nuk ka fjalë ajo çfarë ndjejmë ne dhe gjithë stafi mjekësor që e asistoi gjatë tërë këtyre ditëve të vështira.
Të nderuar qytetarë, na duhet forcë e disiplinë për të shmangur dhembje të tjera.
Të mbrojmë veten dhe të dashurit tanë. Jeta ka vlerë sepse ajo e bën të mundur çdo shpresë e çdo projekt.
Kurrë nuk është mjaft kujdesi. Le të mos shpërqendrohemi nga mbrojtja në këtë betejë që hera – herës i kapërcen mundësitë tona të deritanishme.
Të zbatojmë rregullat, të mbrojmë e shpëtojmë jetë. Duhet të besojmë realisht që kjo fazë është e përkohshme dhe nuk duhet të rrezikojmë një jetë të tërë nga pakujdesitë në këto pak javë. /Insajderi.com
