Kryetari i Lidhjes Demokratike të Kosovës (LDK), Isa Mustafa ka dal menjëherë me një reagim pas komunikatës së Departamentit Amerikan lidhur me deklaratën e kryeministrit në largim, Albin Kurti, i cili pretendonte për një marrëveshje sekrete ShBA – Kosovë.
Përmes një postimi në llogarinë e tij në Facebook, Mustafa e ka quajtur Kurtin të dështuar, duke thënë se duhet t’u kërkoj falje të gjithë qytetarë të Kosovës, raporton Gazeta Insajderi.
“Të dështuarit që fajësuan SHBA-të për pazotësinë e tyre, sot duhet t’u kërkojnë falje të gjithë qytetarëve të Kosovës dhe miqve tanë për konstruksionet e servuara parreshtur dhe fyerjet e paskurpullta të drejtuara ndaj LDK-së dhe figurave të saj”, ka shkrur Mustafa.
Sipas Mustafës, Kurti ka ikur nga pushteti qeverisës për shkak të pazotësisë dhe frikës për copëtimin e Kosovës.
“Kjo është prova më e mirë që dëshmon se ata ikën nga pushteti si pasojë e pazotësisë dhe jo nga frika për copëtimin e Kosovës. SHBA sonte demantuan spekulimet se ekziston një plan sekret për shkëmbim të territorit!”, ka shkruar Mustafa.
Departamenti amerikan i Shtetit, përmes një njoftimi të nënshkruar nga përfaqësuesit kryesorë të saj për Kosovën ka theksuar se nuk ka ndonjë plan sekret për shkëmbim territoresh midis Kosovës dhe Serbisë, duke i quajtur “spekulime” pretendimet e tilla.
Përmes një deklarate të përbashkët të të dërguarit të posaçëm të administratës Trump për dialogun Kosovë-Serbi, Richard Grenell, ambasadorit amerikan në Kosovë, Philip Kosnett dhe përfaqësuesit të posaçëm për Ballkanin Perëndimor, Mattheë Palmer, ata kanë shprehur besimin për një energji të re në procesin e dialogut, e cila do të rezultojë me njohje të ndërsjellë.
Deklarata është lëshuar në formë njoftimi për shtyp nga Departamenti amerikan i Shtetit.
“SHBA-ja është pranë qytetarëve të Kosovës. Ne përgëzojmë përpjekjet e vazhdueshme të profesionistëve shëndetësorë dhe tjerëve, të cilët janë duke bërë punë të madhe, me një rrezik të madh, për ta reduktuar përhapjen e COVID-19 në Kosovë. Në këtë kohë paqartësish, u bëjmë thirrje liderëve të Kosovës që ta respektojnë Kushtetutën e Kosovës dhe sundimin e ligjit. Jemi të përkushtuar që të punojmë me secilën qeveri të krijuar përmes procesit kushtetues”, shkruan në njoftim.
Krahas kësaj, përmes njoftimit është përsëritur thirrja për heqjen e plotë të tarifave. “Besojmë se tarifat janë duke dëmtuar popullin e Kosovës, duke penguar bashkëpunimin rajonal kundër COVID-10 – përfshirë përmes zvarritjes së hyrjes në Kosovë të pajisjeve të domosdosjme – dhe duke e penguar zhvillimin ekonomik”.
“Duam ta bëjmë të qartë se nuk ka plan sekret për shkëmbim territoresh midis Kosovës dhe Serbisë, si kanë spekuluar disa. Përfaqësuesi i posaçëm, Richard Grenell nuk e ka parë dhe as që ka diskutuar ndonjë plan të tillë. Fokusi i Qeverisë së SHBA-së në përkrahjen e marrëveshjeve të kohëmëparshme për kthimin e lidhjeve ajrore, hekurudhore dhe rrugore synon ta përmirësojë gjendjen ekonomike dhe të krijojë momentum ekonomik. Besojmë se ky momentum do të japë energji të re për një proces dialogu që do të rezultojë me njohje të ndërsjellë”, shkruan në njoftim. /Insajderi.com
