Raportuesja për Kosovën në Parlamentin Evropian, Viola Von Cramon, e ka uruar popullin e Kosovës për 13 vjetorin e pavarësisë, ndërsa ka deklaruar se nuk ka perspektivë për Kosovën në Bashkimin Evropian pa u arritur një marrëveshje me Serbinë, njofton Insajderi.
Në një postim në Twitter, Von Cramon ka përmendur edhe dialogun me Serbinë, për të cilin tha se nuk duhet të neglizhohet assesi.
“Gëzuar ditën e pavarësisë #Kosovë! Ju keni bërë shumë hapa në rrugën e gjatë dhe ajo që është përpara jush nuk është vetëm e lehtë. Por vendi juaj është plot potencial. Paqëndrueshmëria shpesh duket si rregull jo përjashtim, por për shoqërinë do të jetë më i rëndësishëm #polarizimi dhe më shumë #bashkimi”, ka shkruar Von Cramon.
Ajo ka thënë se përveç luftimit të korrupsionit dhe zhvillimit të ekonomisë, dialogu me Serbinë s’duhet të neglizhohet.
“Kosova dëshiron të shkojë përpara në rrugën e saj evropiane dhe ka shumë punë përpara. Brenda saj, ju duhet ta luftoni korrupsionin dhe ta ndihmoni ekonominë, por dialogu me Beogradin është diçka që nuk mund ta neglizhoni. Pa një marrëveshje me Serbinë, nuk ka perspektivë për integrimin në BE”, ka theksuar ajo.
Von Cramon i ka përmendur edhe kompromiset që duhet t’i bëjë Kosova.
“Askush nuk duhet të presë që ka një të ardhme më të mirë përpara pa punë, angazhim dhe madje pa kompromise. Tani ka mundësi të reja, përdorni ato! Dhe sot shijoni pushimet tuaja! Urime Dita e Pavarësisë!”, ka shkruar tutje ajo./Insajderi.com
