Presidenti i Serbisë Aleksandar Vuçiq ka deklaruar se e vlerëson entuziazmin e emisarit të posaçëm të presidentit amerikan për bisedime në mes Kosovës dhe Serbisë, Richard Grenell, i cili të premten e viziton Beogradin, por “nuk shkon aq lehtë” me përshpejtimin e bisedimeve.
Ai ka pretenduar se në Dallas ka biseduar me këshilltarin amerikan për siguri kombëtare Robert O’Brien, dhe se O’Brien dhe Grenell “tregojnë energji të madhe” si dhe se për Serbinë është i rëndësishëm përmirësimi i marrëdhënieve me Kosovën.
Ai ka thënë se Grenell, para arritjes në Beograd, kryesisht ka folur për ekonomi.
“Do të bisedojmë për gjithçka. Është e pakuptimtë të flasim për trafikun ajror, e të mos mund të transportojmë mallra”, ka thënë Vuçiq duke i përmendur taksat kosovare në prodhimet serbe.
Ai ka thënë se gjithmonë është i kujdesshëm para takimit me Grenellin, por se i respekton qëllimet dhe energjinë e Grenellit, për të cilin ka thënë se është njeri i cili ka pasion të veçantë në politikë./Insajderi.com.
