Presidenti i Serbisë, Aleksandar Vuçiq, tha se është i shqetësuar për “rrahjen e serbëve” në Kosovë, përcjell Insajderi.com.
Sipas mediave serbe, Vuçiq është deklaruar se kjo është një pyetje për NATO-n dhe Bashkimin Evropian se pse e lejojnë këtë.
Ndërkaq këtë e ka demantuar Policia e Kosovës përmes një sqarimi, ku thuhet se është lajm tendencioz dhe i pavërtetë i publikuar nga një medium i cili “në vazhdimësi po publikon dezinformacione të tilla”.
“Lajmi i radhës i publikuar sot (23.09.21) nga ky medium, se kinse në afërsi të pikë kalimit kufitar në Bërnjak njësia speciale nga Prishtina ka rrahur tre persona serb nuk qëndron, është i pavërtetë dhe ka për qëllim dezinformimin e opinionit, për të paraqitur një situatë pasigurie për qytetarët si dhe për të plotësuar ambiciet e ndryshme politike të orientuara nga jashtë”, thuhet ndër tjerash në njoftimin e Policisë.
