Aleksandër Vulin nuk është zyrtari i vetëm serb që përdorë në fjalorin e tij terma ofendues për shqiptarët. Njëjtë kishte bërë vitin e kaluar edhe Marko Gjuriq. Ndërsa shprehja “shiptari” që e përdorin këta të dy për shqiptarët mund të haset gati se rregullisht në titujt e disa tabloideve serbe, të cilat janë të afërta me presidentin e Serbisë, Aleksandar Vuçiq, dhe partinë e tij. Në Kosovë asnjëherë nuk ka ndodhur që një ministër kosovar të përdorë termin ekuivalent ofendues për serbët që është “shkije”. Gjithashtu në media asnjëherë nuk ndodhë që t’u referohen serbëve me këtë term.
Pas reagimit të ministres së Jashtme të Kosovës, Meliza Haradinaj-Stublla, për gjuhën shoviniste të ministrit serb, Aleksandër Vulin, të përdorur në një deklaratë të tij kur ka folur për shqiptarët, ky i fundit ka reaguar përsëri duke ofenduar ministren kosovare
Haradinaj-Stublla iu drejtua me një letër të hapur shteteve të Quntit, duke u kërkuar ta dënojnë gjuhën e Vulin-it, i cili përdori termin ofendues “shiptari”, kur ka folur për qytetarët e Kosovës.
Vulin ka shkruar përsëri, po përsëri duke përdorur të njëjtën gjuhë ofenduese.
“Nëse Haradinaj-Stubla ka turp që është grua shqiptare, nuk duhet të zemërohet me mua. Siç e quajnë veten e tyre, kështu do t’i quaj edhe unë, kur ata shqiptojnë fjalën shqiptar nga gjuha e tyre, unë do t’i quaj ata ashtu si ata e quajnë vetën. Deri atëherë, unë do të respektoj zakonet dhe gjuhën e tyre, dhe me respekt do t’i drejtohem ‘shiptari’ siç e quajnë ata vetë”, ka deklaruar Vulin.
Vulin ka vazhduar me përgojimet e tij duke thënë se nëse dëshiron Haradinaj-Stublla të merret bashkësia ndërkombëtare me deklaratën e tij, atëherë le të merren edhe me, siç ka thënë ai “vrasësit e UÇK-së”, duke u ankuar se pas luftës janë vrarë serbë në Kosovë.
Nuk është hera e parë që Aleksandër Vulin u drejtohet shqiptarëve me këtë term ofendues. Ai kishte bërë deklarim të tillë edhe vitin e kaluar kur kishte thënë se është urgjente që të përcaktohet vija kufitare me shqiptarët, apo siç ishte shprehur ai “me shiptari”.
Përveç që termi që përdor Vulin është një term ofendues në raport me shqiptarët, në Serbi është edhe e kundërligjshme t’u drejtohesh shqiptarëve ashtu.
Tashmë ekziston një aktgjykim në Serbi, sipas të cilit fjala “shqiptari” është politikisht jokorrekte dhe term ofendues dhe se shqiptarët e përjetojnë atë si fyerje.
Ministri Vulin nuk është i vetmi nga zyrtarët serbë që flet në këtë mënyrë për shqiptarët. Edhe drejtori i Zyrës për Kosovën në Qeverinë e Serbisë, Marko Gjuriq, në një komunikatë zyrtare të lëshuar gjatë javës së dytë të muajit prill të vitit të kaluar, i kishte quajtur shqiptarët me termin “shqiptari”.
Kjo shprehje mund të haset gati se rregullisht në titujt e disa tabloideve, të cilat janë të afërta me presidentin e Serbisë, Aleksandar Vuçiq, dhe partinë e tij./Insajderi.com
