Për vite ka pasur thashetheme nëse përdorimi ose jo i antiperspirantëve është i lidhur me një shans të rritur për kancer të gjirit. Për dallim nga deodorantët, të cilët nuk përmbajnë përbërës bllokues të djersës, antiperspirantët mbyllin gjëndrat e djersës për të na parandaluar djersitjen.
Me fjalë të tjera, deodorantët përdorin përbërës që maskojnë erën e shkaktuar nga djersa, ndërsa shumica e antiperspirantëve e ndërpresin djersitjen përmes një përbërësi të quajtur aluminum (disa antiperspirantë në vend të kësaj përdorin sode buke, por është shumë më pak efektive). Aluminumi vepron si një prizë për gjëndrat tuaja të djersës – është përbërësi që ju pengon të djersiteni.
Sipas Institutit Kombëtar të Kancerit, “për shkak se antiperspirantët ose deodorantët aplikohen pranë gjirit dhe përmbajnë përbërës potencialisht të dëmshëm, shumë shkencëtarë dhe të tjerë kanë sugjeruar një lidhje të mundshme midis përdorimit të tyre dhe kancerit të gjirit. Sidoqoftë, asnjë provë shkencore nuk e lidh përdorimin e këtyre produkteve me zhvillimin e kancerit të gjirit”.
Ekziston një studim i pambështetur që gjeti një lidhje midis kancerit të gjirit tek gratë që përdorën antiperspirantë menjëherë pas rruajtjes së sqetullave, por Dr. Rosemarie Ingleton i thotë HelloGiggles se studimi nuk është në asnjë revistë mjekësore. “Në mendjet tona, mund të ketë kuptim që gjëja që po vendosni më së afërti gjoksit tuaj mund të jetë e dyshimtë”, thotë ajo, por Administrata e Ushqimit dhe Barnave (FDA) nuk ka gjetur ndonjë lidhje midis kancerit dhe aluminumit.
A duhet të përdorni antiperspirantë nëse keni kancer të gjirit dhe po bëni rrezatim?
Sipas Organizatës së Kancerit të Gjirit, pacientëve me kancer të gjirit shpesh u thuhet të përmbahen nga përdorimi i antiperspirantëve gjatë trajtimit me rrezatim. Sidoqoftë, organizata thotë se arsyeja për këtë nuk është për shkak të aluminumit, por sepse “mjekët janë të shqetësuar që antiperspirantët – ose ndonjë produkt” të aplikuar në lëkurë në zonën e trajtimit mund të irritojnë më tej lëkurën përtej asaj që rrezatimi tashmë po bën”./Insajderi.com
