fbpx

Policia sekuestron edhe mësimin e preferuar të Sokol Bashotës

Policia sekuestron edhe mësimin e preferuar të Sokol Bashotës

Kukunews ka arritur të sigurojë disa nga dokumentet që janë sekuestruar nga bastisja e ditës së enjte në zyrat dhe hapësirat tjera të kryetarit të Komunës së Klinës.

Një nga dokumentet e sekuestruara, e që është i rëndësishëm për rastin “Saja Koli” është edhe një faqe e shqyer e Abetares së vjetër, e cila është gjetur në dollapin me kod në zyrën e Bashotës.

Në këtë mësim të titulluar “Saja” në të cilin personazh është saja e Sokolit që fluturon mbi borë dhe që nuk di të ndalet, sipas policisë përbën një kodim që pas analizave mund të çojë në zbardhjen e rastit të keqpërdorimeve.

“Ne dyshojmë se fjalia ‘Saja e Sokolit kaloi fluturim. Mirëpo, Sokoli u përplas me sajë në borë. Mos, Sokol, mos – e porositi e ëma, Sokoli nuk bëri më si përpara’ është kod që do të qoj në zbardhjen e historisë së Sokol Bashotës”, thuhet në njoftimin e prokurorisë.

sokoli

Mësimi në faqen 65 që përfundon me fjalinë motivuese “Samiri mëson mësimin, Sokoli nuk pati kujdes”, besohet të jetë gjithashtu edhe një tjetër fjali që Tasfkorca për Dekodim në Policinë e Kosovës do të merret këto ditë.

Në anën tjetër një punëtor në Komunën e Klinës, zyra e së cilit është shumë afër asaj të kryetarit i ka thënë Kukunews se Bashota e ka ruajtur gjithmonë me xhelozi këtë faqe të mësimit të Abetares por askush asnjëherë nuk ka menduar se aty fshihet e vërteta.

“Kemi menduar se kryetari është i lidhur ngushtë me atë mësim qysh prej klasës së parë pasi edhe e ka ditur përmendësh krejt mësimin”, ka thënë punëtori, që deshi të mbes anonim për publikun.