Rrushi me erë është një frut që gjindet me shumicë në vendin tonë dhe tani është koha e duhur për vjeljen tij, prandaj e gjejmë pothuajse kudo, në dyqanet e afërta, në tregjet e qytetit, apo si pjesë të recetave.
Janë të paktë ata që nuk u pëlqen ky lloj rrushi, e nëse ndodh, është kryesisht për shkak të lëkurës më të trashë krahasuar me rrushin e zakonshëm, mirëpo kjo gjë e ka bërë burim të madh të antioksidantëve.
Përpos konsumimit, ky lloj rrushi mund të përdoret për pregatitjen e verës dhe rakisë.
Mirëpo përpos këtyre vetive, po sjellim për ju informata të cilat do të ju tregojnë më shumë për benefitet e rrushit me erë për shëndetin tonë.
Për Shëndetin e Trurit, Zemrës dhe Kockave
Rrushi me erë është i pasur në vlera ushqyese. Ndihmon në parandalimin e osteoporozës, problemet me kockat duke ndikuar në ruajtjen e dendësisë së tyre. Gjithashtu, rrushi me erë ka veti të forta në parandalimin e krijimit të venave varikoze.
Ndihmon në përmirësimin e funksionimit të trurit dhe parandalon lindjen e disa sëmundjeve degjeneruese.
Duke patur në përbërjen e saj sheqerna të thithshme nga trupi i njeriut si fruktoza dhe glukoza, rrushi me erë, por jo vetëm edhe llojet e tjera të tij duhet të konsumohet në sasi të kontrollueshme nga diabetikët.
Rrushi përmban shumë antioksidantë dhe energji natyrale, është i pasur me kuercetinë dhe resveratrol. Të dy njihen si antioksidantët më të fuqishëm.
Të gjitha llojet e rrushit përmbajnë polifenolë të njohur si acidi fenolik dhe flavonoide. Fruti i rrushit ndihmon në uljen e rrezikut të formimit të trombozës që mund të shkaktojë atak në zemër.
Ekspertët sugjerojnë se rrushi jo vetëm që pakëson gjasat e mpiksjes së gjakut në arterie, por edhe forcon oksidin nitrik që i mban arteriet të shëndetshme e të forta.
Lëngu i rrushit përmban flavonoidë që parandalojnë oksidimin e kolesterolit të keq në trup, që shkakton një barrë të rëndë në arterie dhe shkakton arterosklerozë./Insajderi.com
