Migrena mund të jetë dobësuese - jo vetëm në kuptimin fizik, por edhe në atë emocional.
Yuko Nippoda, psikoterapiste dhe zëdhënëse e Këshillit të Mbretërisë së Bashkuar për Psikoterapi (UKCP), konfirmon se njerëzit me migrenë kronike shpesh mund të përjetojnë ankth, depresion dhe ndikime të tjera emocionale, shkruan Health Line, transmeton Insajderi.
“Ju mund të ndiheni të shqetësuar kur do të vijë një sulm tjetër, si do ta menaxhoni atë, dhe nëse migrena mund të shkaktojë sëmundje të tjera”, shpjegon ajo.
Shumë njerëz shqetësohen gjithashtu për anulimin e planeve ose mosrespektimin e angazhimeve të tyre, gjë që mund të shkaktojë ankth për humbjen e miqve ose vendeve të punës.
“Ky ankth mund të çojë në një frikë se gjithçka mund të shkojë keq në jetën tuaj”, thotë Nippoda.
Nëse rregullisht nuk jeni në gjendje të merrni pjesë në jetën e përditshme si rezultat i migrenës, mund të përjetoni edhe ndjenja depresioni.
“Ju mund të pyesni pse e keni [këtë gjendje] dhe mund të ndjeni zemërim ose të fajësoni veten që nuk po ia dilni mirë”, thotë Nippoda.
Ndjenjat e izolimit dhe vetmisë janë gjithashtu të zakonshme, pasi mund të jetë e vështirë për të tjerët të kuptojnë se çfarë po kaloni nëse nuk kanë migrenë.
Nippoda thotë se të gjitha këto ndjenja janë normale dhe nuk duhet ta ndëshkoni veten për këtë, pasi kjo mund t’ju bëjë të ndiheni më keq.
“Migrena është një gjendje kronike e padukshme dhe [kjo] mund të keqkuptohet lehtë nga njerëzit e tjerë, gjë që mund të çojë në ndjenja turpi dhe faji,” shpjegon ajo. /Insajderi.com
