Takimi në mes partnereve të koalicionit; Lidhjes Demokratike të Kosovës, Aleancës për Ardhmërinë e Kosovës dhe NISMA Socialdemokrate, është shtyrë për të hënën.
Ky takim ishte planifikuar të mbahej sot.
Zëdhënësi i Aleancës për Ardhmërinë e Kosovës, Lulezim Blaka, tha për Insajderi.com, se takimi është shtyrë për shkaqe objektive dhe do të mbahet ditën e hënë.
“Po takimi është shtyrë për shkaqe objektive dhe do të zhvillohet të hënën”.
Insajderi, të mërkurën, ka raportuar se Fatmir Limaj ndodhet jashtë vendit.
Burime të Insajderit brenda NISMA-s thonë se arsyeja pse nuk do të zhvillohet ky takim është mungesa e Limajt.
Deputetja e NISMA-së, Arbëreshë Krasniqi, tha të mërkurën për Insajderin se nuk ekziston asnjë mosmarrëveshjes në mes LDK-së dhe NISMA-s.
Lideri i AAK-së, Ramush Haradinaj, ka qenë kritik ndaj orientimit që Avdullah Hoti, i ka dhënë dialogut me Serbinë dhe emërimit të Skender Hysenit si Koordinator Shtetëror, pa u dakorduar partnerët e koalicionit.
Ditë më parë, AAK, shpalli kandidaturën e Haradinajt për president, për të qenë e hapur edhe një temë tjetër në tavolinën e liderëve të partive të koalicionit. /Insajderi.com/
