Kur të gjithë po prisnin një marrëveshje ndërmjet Albin Kurtit dhe Isa Mustafës – ata sonte u dakorduan vetëm që të takohen sërish!
Njëjtë siç kishin përfunduar edhe tri takimet paraprake të tyre, të mbajtura dy në fund të nëntorit, më 22 dhe 30 dhe tjetri më 2 dhjetor, shkruan Insajderi.
Por ku është duke ngecur “koalicioni i shpresës”?
Duket se takimi i fillimit të dhjetorit “përçau” Vetëvendosjen dhe Lidhjen Demokratike të Kosovës.
Dy partitë që tash e një kohë po tentojnë bashkimin në pozitë, atë ditë nuk arritën të dakordoheshin kur erdhi puna te ndarja e posteve.
Isa Mustafa, pasi që zgjodhi i pari ministrinë e Punëve të Brendshme, e vuri si kusht edhe pozitën e të parit të shtetit.
Derisa edhe takimi i sontëm rezultoi pa marrëveshje, VV e LDK ende nuk kanë vendosur se cila do të tërhiqet nga kushtet që dhanë për të finalizuar marrëveshjen, shkruan Insajderi.
Nëpër deklarata u bë shumë e qartë se Vetëvendosje s’e jep postin e presidentit si pjesë të pazarit, dhe se LDK-ja nuk shkon në qeveri me Kurtin pa u marrë vesh për këtë post.
Pavarësisht të gjithave, Albin Kurti sonte u shpreh i bindur se nuk do të ketë asnjë pengesë për arritjen e marrëveshjes finale.
Lideri i Vetëvendosjes, Albin Kurti para takimit të sotëm me kreun e LDK-së, Isa Mustafa u shpreh i bindur se nuk do të ketë asnjë pengesë, përshirë postin e presidentit që nuk do të tejkalohet me LDK-në për të formuar qeverinë e ardhshme, pas zgjedhjeve të 6 tetorit.
“Unë jam optimist se do t’i tejkalojmë të gjitha diferencat e vogla. Në njërën anë ekziston mirëbesimi ynë, në anën tjetër po ashtu dhe dëshira e madhe për ndryshime politike në vendin tonë. Sa i përket rezultateve konkrete nga këto bisedime, natyrisht se do t’iu njoftojmë atëherë kur do t’i kemi ato. Por mos dyshoni në suksesin e plotë të formimit të koalicionit qeverisës se populli me 6 tetor ka vendosur për ndryshime dhe qe besa me zgjedhjet e tij nuk na ka lënë zgjedhjeve neve. Do të bëhet VV-LDK, sepse kështu ka dashur populli… s’ka pengesë që nuk e tejkalojmë”, tha Kurti para takimit me Mustafën.
Ndryshe sonte të dy partitë janë pajtuar që të vazhdojnë takimet e intensifikuara gjatë ditëve në vazhdim, shkruan Insajderi.
Mbetet të shihet nëse Kurti dhe Mustafa gjatë ditëve të ardhshme do të pajtohen për të bërë bashkë “hapin e madh”./Insajderi.com
