Policia e Kosovës ka njoftuar se i dyshuari për vrasjen në Pejë, e cila ndodhi pasditen e së martës, gjendet në arrati, përcjell Insajderi.
Përmes raportit 24 orësh, policia ka bërë të ditur se në vendin e ngjarjes janë gjetur dhe sekuestruar një pistoletë dhe disa gëzhoja.
E gjithë ngjarja ka ndodhur në rrugën “Xhin Gazuli”, rreth orës 15:39.
“Është raportuar se në rrethana të panjohura, një i dyshuar mashkull ka qëlluar me armë zjarri për vdekje viktimën mashkull kosovar dhe është larguar në drejtim të panjohur. Njësit relevante dhe ekipi mjekësor kanë dalë në vendin e ngjarjes ku është konfirmuar vdekja e viktimës ndërsa afër tij është gjetur dhe sekuestruar një pistoletë dhe disa gëzhoja”, thuhet në raport.
Me vendim të prokurorit trupi i pajetë i viktimës është dërguar në Institutin e Mjekësisë Ligjore për obduksion, ndërsa rasti vazhdon të hetohet./Insajderi.com