Presidenti i Serbisë, Aleksandër Vuçiq, ka deklaruar se drejtoresha ekzekutive e Shërbimit Evropian të Shërbimit të Jashtëm, Angelina Eichhorst, nuk mund të jetë autore e një non paper” i publikuar të hënën.
“Nuk mund ta konfirmoj atë, sepse nuk mendoj kështu. Kjo nuk më duket si Angelina Eichhorst dhe jam i bindur që ajo nuk e bëri këtë”, tha Vuçiq, raporton agjencia e lajmeve serbe Tanjug, transmeton Insajderi.
Vuçiq ka frikë se këtë mund ta ketë shkruar dikush që është i afërt me Kosovën.
“Kam frikë se botimi i “non-paper”-it ishte një strategji e qëllimshme në disa qarqe që janë më afër pikëpamjeve të Prishtinës sesa Beogradit, në kuptimin taktik”, theksoi i pari në Serbi.
Një gjë të tillë nuk e mohoi as kryeparlamentari serb, Ivica Daçiq.
Dokumenti i publikuar të hënën përmban idenë e krijimit të një “autonomie” e që do të quhej “Kosova Veriore”.
Në dokument thuhej se për t’u arritur një gjë e tillë Kosova dhe Serbia “duhet të bëjnë ndryshime kushtetuese”. /Insjaderi.com
