Shoqëria Kulturore Artistike AGIMI ua ka dërguar një letër e hapur Kryetarit të Komunës së Prizrenit, Drejtorëve të Drejtorisë së Arsimit dhe Kulturës, Rinisë dhe Sportit, duke reaguar ndaj përkrahjes së grupit jo legjitim të ShKA “AGIMI”.
Kjo shoqëri kulturore ka thënë se janë jashtëzakonisht të zhgënjyer nga përkrahjet e fundit të Komunës së Prizrenit ndaj grupit jo legjitim të ShKA “AGIMI”.
“Kryesia e ShKA “AGIMI”, ju ka njoftuar që në fillim të mandatit tuaj për të gjitha parregullsitë të cilat janë duke ndodhur në emër të shoqërisë “AGIMI” nga një grup individësh, të ardhur njëherë nga një Kryesi me mandat të kaluar, e së fundmi të vetëshpallur Kryesi e ShKA “AGIMI”, thuhet në letër.
“Reagimet tona të shumta publike kanë vënë në pah parregullsitë e vazhdueshme të cilat janë duke ndodhur në objektin e mbajtur peng nga ky grup jo legjitim, dhe për më tepër për venitjen e vlerave kulturore të ShKA “AGIMI”, vazhdon reagimi i tyre.
Letra e plotë:
I nderuari Z.Mytaher Haskuka,
I nderuari Z. Ehat Oreshka,
I nderuari Z. Skender Susuri,
Jemi jashtëzakonisht të zhgënjyer nga përkrahjet e fundit të Komunës së Prizrenit ndaj grupit jo legjitim të ShKA ‘’AGIMI”. Kryesia e ShKA ‘’AGIMI’’ , ju ka njoftuar që në fillim të mandatit tuaj për të gjitha parregullsitë të cilat janë duke ndodhur në emër të shoqërisë ‘’AGIMI’’ nga një grup individësh, të ardhur njëherë nga një Kryesi me mandat të kaluar, e së fundmi të vetëshpallur Kryesi e ShKA ‘’AGIMI’’. Reagimet tona të shumta publike kanë vënë në pah parregullsitë e vazhdueshme të cilat janë duke ndodhur në objektin e mbajtur peng nga ky grup jo legjitim, dhe për më tepër për venitjen e vlerave kulturore të ShKA ‘’AGIMI’’. Koncerti ynë protestë për nder të 28 Nëntorit ka dëshmuar për anëtarësinë e vërtetë të ShKA ‘’AGIMI”, të cilët vazhdojnë të mbeten jasht dyreve të shoqërisë ku kanë kontribuar me dekada.
Ndaj të gjitha shqetësimeve të lartëcekura, së fundmi është vërejtur përkushtimi i Ministrisë së Kulturës, Rinisë dhe Sportit, posaqërisht Ministrit z.Kujtim Gashi, me angazhimin e të cilëve ka filluar procesi për kristalizimin e situatës dhe inicimin e procedurave për mbajtjen e një Kuvendi Zgjedhor demokratik. Me inicimin e MKRS-së, është krijuar një grup punuës (me nga tre përfaqësues), të cilët më datë 17 janar 2018 kanë nëshkruar një marrëveshje bashkëpunimi e cila siguron që palët e ngarkuara do të punojnë së bashku në hartimin e statutit të ri konform ligjeve në fuqi. Kjo marrëveshje pezullon mandatin e përfaqësusve aktual të këtij institucioni, deri në zgjedhjen e Kryesisë së dalur nga Kuvendi Zgjedhor. Pas marrëveshjes së nënshkruar, grupet janë takuar për të punuar rreth finalizimit të statutit të ri dhe pregaditjeve për Kuvendin Zgjedhor të përbashkët. Pjesë e konstruktive e këtij takimi ishte edhe Drejtori i DKRS-së në Komunën e Prizrenit, z. Ehat Oreshka.
Ne i jemi përmbajtur plotësisht marrëveshjes së nënshkruar, duke ndërprerë të gjitha aktivitetet, deri në kristalizimin e situatës dhe jemi në pritje të hapave të mëturjeshme nga ana e MKRS-së. Përderisa treshja tjetër ka vazhduar me keqpërdorimin e marrëveshjes së arritur, duke vazhduar ‘’aktivitetet’’ dhe marrjen e vendimeve të rëndësishme në emër të ShKA ‘’AGIMI”.
Përkrahja e Drejtorisë së Kulturës, Rinisë dhe Sporitit me rastin e Koncertit Festiv të datës 17 Shkurt dhe së fundmi përkrahja e Drejtorisë së Arsimit në bashkëorganizimin e Koncertit Festiv të datës 07 Mars ndaj këtij grupi, aktiviteti i të cilit është pezulluar sipas marrëveshjes së përpiluar nga përfaqësuesit ligjorë të MKRS-së, është një goditje e rëndë për vlerat kulturore dhe transparencën në qytetin tonë. Përkrahja e individëve të cilët janë duke keqpërdorur emrin e Sh.K.A ‘’AGIMI’’ paraqet një bashkërendim me grupin jo legjitim që ka shënderuar vatrën e kulturës në një kafene burrash, dhe ka shuar zërat e anëtarëve të vërtetë duke i mbajtur jasht objektit të Sh.K.A ‘’AGIMI’’.
Ne konsiderojmë se përkrahja e këtij grupi, përbën shkelje të vullnetit artistik të individëve të mbetur jashtë dyerve të shoqërisë ‘’AGIMI’’ dhe për më tepër shkelje të vullnetit të angazhimit të kapaciteteve njerëzore dhe material të MKRS-së në kristalizimine situatës në shoqërinë tonë.
Me respekt,
Kryesia e ShKA Agimit (Besim Berisha, Agnesa Laçi Çipa, Arben Mashkulli, Flaka Xërxa, Fikrim Emra, Arbëreshë Berisha dhe Luljeta Braha)
