Ansambli i këngëve dhe valleve “Shota” vazhdon të ketë në krye një ushtrues detyre, ndërkohë Ministria e Kulturës Rinisë dhe Kulturës, nuk ka interesimin më të vogël që të ndërmarrë masa.
Gazeta Alo ka mësuar se ish-drejtori Shefqet Gjocaj ka “uzurpuar” zyrën, dhe nuk është larguar edhe pasi është emëruar ushtruesi i detyrës së drejtorit, Nazmi Demaj.
Pas përfundimit të mandatit të Gjocaj, Ministria kishte hapur konkurs për drejtor të Ansamblit, duke u anuluar më pas. Edhe në këtë konkurs Gjocaj po synonte një mandate tjetër.
E gjithë kjo situatë ka lënë hapësirë për akuza, ndërhyrje politike dhe përzirje kompetencash.
Për Gazetën Alo, ish-drejtori Gjocaj të gjitha akuzat ndaj tij i ka quajtur të pa vërteta duke thënë se kjo ka qenë përpjekje për eliminim nga gara për pozitën e drejtorit.
“Krejt zhurma rreth përzierjes së kompetencave ka qenë zhurmë për diçka tjetër. Qëllimi ka qenë më tepër përbaltosja ose implikimi i emrit tim në gjëra të parregullta, si përpjekje për me më eliminu mu si kandidat,” ka thënë Gjocaj.
Gjocaj e pranon se ka vazhduar aktivitetin e tij deri më 7 mars në Ansamblin “Shota” edhe pasi në krye të ansamblit kishte ardhur një ushtrues detyre, porse sipas tij qëllimi ka qenë shmangia nga boshllëku menaxherial pasiqë Ministria e Kulturës nuk e kishte hapur me kohë konkursin.
“Konkursi nuk ka dal u vonu edhe udhëheqësit artistik dhe ne tash jemi angazhu, e kemi vazhdu punën si të mos kishte ndodhur kurgjë derisa të hapet konkursi,” ka deklaruar Gjocaj.
Se nuk e ka penguar askush për të punuar e pranon edhe ushtruesi i detyrës së drejtorit në Ansamblin “Shota”, Nazmi Demaj.
Madje ky i fundit i hedh fajin Ministrisë së Kulturës për neglizhencë në procesin e zgjedhjes së drejtorit të ri.
Ai tregon se vetë nuk ka dashur të hyjë në zyrë të drejtorit pa pranim-dorëzim të detyrës, porse kjo nuk e pengon për të kryer punët ashtu siç duhet.
“Meqenëse pyetët për zyre, unë nuk kam pranu me hy në zyre pa pranim dorëzim (të detyrës së drejtorit). Në zyre ka plotë gjëra edhe për atë nuk kam pranu me hy në zyre unë. Këtë është dashur të bëj Ministria e Kulturës (pranim-dorëzimin e detyrës së drejtorit) kur ta bëjnë s’ka problem. Unë e kam edhe zyren time, dhe punën e kryej si duhet,” ka thënë Demaj.
Gazeta Alo për disa ditë radhazi ka kërkuar përgjigje edhe nga Ministria e Kulturës Rinisë dhe Sportit, rreth mundësisë së “uzurpimit” të zyrës nga ana e Gjocaj, por pavarësisht insistimeve kjo e fundit nuk ka kthyer ndonjë përgjigje, me arsyetimin se Ministri i Kulturës, Rinisë dhe Sportit gjendej në Francë dhe se nuk kanë marrë përgjigje prej kabinetit./Gazeta Alo/
