Bogova është një fshat që emrin e ka marrë nga burimi me ujin si kristal me të njëjtin emër. Ai nuk gëzon zyrtarisht statusin e një fshati turistik, edhe pse i ka të gjitha potencialet për të qenë i tillë.
Bogova është në njësinë administrative me të njëjtin emër, në bashkinë e Skraparit në Shqipëri. E shtrirë mes maleve dhe e gjelbëruar gjatë gjithë vitit, fshati Bogovë është kthyer në një atraksion turistik për turistë vendas dhe të huaj.
Endri është brezi i tretë i familjes Qato, familjes më të vjetër në Bogovë. Pasi mbaroi shkollën e kulinarisë, tashmë punon në lokalin e tij dhe tregon për gatimet tradicionale, të cilat ia ka mësuar gjyshja.
Kryeplaku i fshati Bogovë, Kujtim Bakiu pohon se vitet e fundit ka një rritje të numrit të turistëve që kanë futur në axhendat e tyre Bogovën.
Ujëvara e Bogovës, me ujë të ftohtë dhe të kristaltë është një perlë e natyrës. E pozicionuar në anën e majtë të luginës së Osumit, kjo perlë natyrore gjendet e fshehur mes pyjeve, shpateve e bimësisë së dendur dhe izolimi i saj përbën pikën e fortë të këtij destinacioni mbresëlënës.
