Ministri i Kulturës, Rinisë dhe i Sportit, Kujtim Gashi, e ka ngushëlluar familjen e regjisorit Bekim Lumi me rastin e vdekjes së tij.
Ai ka thënë se, përveç familjes, edhe bota e artit shqiptar e ka humbur njërin ndër pedagogët dhe regjisorët më të mëdhenj.
“E nderuara familja Lumi, lajmin për vdekjen e parakohshme e të dashurit tuaj, Bekimit, profesorit e regjisorit tonë të madh e të zellshëm, e morëm me pikëllim të madh. Pas një lufte më shumë se dyvjeçare me një sëmundje të rëndë, bota e artit shqiptar dhe jo vetëm, e ka humbur një prej pedagogëve dhe regjisorëve më të talentuar’, thuhet në telegramin e ngushëllimit.
Sipas ministrit Gashi, regjisori Lumi ka qenë ndër përfaqësuesit më të mirë të artit, më ç’ rast ishte nderuar edhe me shumë çmime.
“Regjisori Bekim Lumi, i cili me shfaqjet e tij të shumta e që karakterizoheshin me aspektin minimalist dhe eksperimental, e ka përfaqësuar vendin tonë në shumë festivale teatrore brenda dhe jashtë Kosovës, duke e prezantuar suksesshëm artin teatror ku u nderua edhe me çmime të shumta”, thuhet më tej aty.
“Skenës teatrore të vendit tonë do t’i mungojë zelli dhe kreativiteti i Bekimit dhe për kulturën shqiptare ndarja e parakohshme e tij nga jeta nga beteja me sëmundjen, është një humbje e madhe”, thuhet më shumë në telegramin e ngushëllimit të ministrit Gashi.
“Angazhimi dhe suksesi i tij për familjen duhet të jenë krenari dhe jo dhimbje kurse për ne, shokët, kolegët dhe artdashësit duhet të jetë nxitje dhe frymëzim. Ngushëllime familjes, miqve dhe dashamirëve të Bekim Lumit”, ka përfunduar ai./Insajderi.com
