Nëse mendoni se pirja ose konsumimi i marihuanës ndihmon në kontrollimin e dhimbjeve të të gjitha llojeve, jeni gabim.
Përdorimi i marihuanës para se të shtroheni në spital për një procedurë kirurgjikale mund ta bëjë dhimbjen tuaj gjatë shërimit dukshëm më keq, sipas hulumtimit të fundit, shkruan CNN, transmeton Insajderi.
“Ka disa prova që kanabisi mund të jetë i dobishëm për dhimbjen kronike dhe nervore. Sidoqoftë, hulumtimet e hershme sugjerojnë se ky nuk është rasti për dhimbje akute të tilla si për operacionin e një këmbe të thyer”, tha autori kryesor Dr. Ian Holmen, një anesteziolog në Universitetin e Spitalit të Kolorados në Aurora, në një deklaratë.
Përveç një rritje të dhimbjes akute, njerëzit që përdorën marihuanë para operacionit gjithashtu kishin nevojë për më shumë anestezi gjatë operacionit – gjë që mund të jetë e rrezikshme për disa njerëz, të tillë si të moshuarit ose ata me sëmundje kronike të tilla si diabeti – dhe u deshën të përdorin më shumë opioide gjatë shërimit.
“Ky studim tregon se është e rëndësishme që pacientët t’i tregojnë mjekut të tyre anesteziolog nëse kanë përdorur produkte të kanabisit para operacionit për t’u siguruar që ata marrin anestezinë dhe kontrollin e dhimbjes në mënyrën më të mirë të mundshme, duke përfshirë përdorimin e alternativave jo-opioide”, tha Holmen.
Kërkimi u prezantua në takimin vjetor të Shoqatës Amerikane të Anesteziologëve të hënën. /Insajderi.com
