Një çift në Itali që u takuan në ballkonet e tyre gjatë bllokimit të Coronavirusit tani janë fejuar, duke u bërë një Romeo dhe Xhulietë e ditëve moderne në të njëjtin qytet ku ndodhi historia e Shekspirit për dashnorët më të famshëm të historisë, njofton Insajderi.
Ishte dashuri me shikim të parë për Michele D’Alpaos, 38 vjeçar, i cili kujton momentin kur ai vuri sytë në Paola Agnelli, 40 vjeçare, ndërsa ajo ecte nëpër tarracën e banesës së saj në Verona.
“Ishte pasdite e 17 Marsit, kur u detyrova të punoja nga shtëpia për shkak të bllokimit”, tha D’Alpaos për CNN. “Pashë këtë vajzë të bukur, Paola. Menjëherë u trondita nga bukuria e kësaj vajze, nga buzëqeshja e saj. Duhej ta njihja atë”.
Çifti kishte jetuar në ndërtesa përballë njëri-tjetrit pothuajse tërë jetën e tyre, por kurrë nuk ishin në dijeni të ekzistencës së njëri-tjetrit. Por atë pasdite, ndërsa motra e saj luante violinë në ballkonin e tyre siç bënte çdo mbrëmje për të gëzuar banorët e karantinuar, Agnelli kapi shikimin e D’Alpaos.
“Menjëherë mendova: ‘Çfarë djali i bukur’”, tha Agnelli për CNN. “Mendoj që ma dërgoi perëndia”.
Edhe pse ata nuk njihnin njëri tjetrin, fati gjeti një rrugë për ta.
Agnelli njihtë motrën e D’Alpaos sepse frekuentonin të njëjtën palestër dhe ndiqnin njëra tjetrën në Instagram. Në momentin që kuptoi këtë, ai krijoi një llogari në Instagram, dhe i bëri ‘follow’ Agnelli-t.
Nga ai moment që Agnelli pranoi kërkesën e D’Alpaos për miqësi, mëngjeset e tyre zbardhnin duke biseduar me njëri tjetrin.
Më 4 maj, gati dy muaj nga fillimi i historisë së tyre të dashurisë, Agnelli dhe D’Alpaos më në fund ishin në gjendje të takoheshin në një kopsht afër shtëpive të tyre.
“Ne as nuk folëm, u ulëm në një stol dhe u puthëm për gjysmë ore si dy adoleshentë”, tha D’Alpaos.
Ndërsa shumë njerëz do të kishin frikë se kimia e tyre nuk do të përkthehej në jetën reale, çifti menjëherë kapi ritmin. Ata e kaluan verën duke befasuar njëri-tjetrin në plazh, duke kaluar ditëlindjet së bashku dhe duke planifikuar takime romantike që fillonin në mëngjes dhe nuk mbaronin deri natën vonë.
Ndërsa të dy thanë se janë fejuar, detajet janë mbajtur private dhe aktualisht nuk ka plane për një datë martese apo vendndodhje, por ajo që ata e dinë me siguri është dëshira për të krijuar familje.
D’Alpaos vuri në dukje se tragjedia e Shekspirit bazohet në dy familje rivale dhe historia e Romeos dhe Xhulietës “përfundon në tragjedi me të dy të rinjtë që bëjnë vetëvrasje”.
“Le të shpresojmë që historia jonë të ketë një fund më të mirë se ky”. /Insajderi.com
Burimi: CNN
