Kryeministri i Armenisë, Nikol Pashinian, ka thënë se ai nuk sheh mundësi të zgjidhjes diplomatike të konfliktit për rajonin e Nagorno-Karabakhut, duke zvogëluar përpjekjet ndërkombëtare për armëpushim të qëndrueshëm në mes të Armenisë dhe Azerbajxhanit për këtë territor.
“Ne duhet ta kuptojmë se çështja e Karabakhut, të paktën në këtë fazë dhe për një kohë të gjatë, nuk mund të ketë zgjidhje diplomatike”, ka thënë Pashanian gjatë një fjalimi të transmetuar edhe në rrjetin social, Facebook, transmeton Insajderi.
“Gjithçka që është e pranueshme në aspektin diplomatik për palën e Armenisë, nuk është e pranueshme më për Azerbajxhanin”, ka thënë ai, duke u bërë thirrje armenëve “të kapin armët dhe të mbrojnë atdheun”.
Komentet e Pashinianit kanë ardhur pas deklaratave të presidentit azerbajxhanas, Ilham Aliyev, i cili ka thënë se parasheh një rezolutë ushtarake për krizën dhe se forcat e Azerbajxhanit do të largojnë armenët “nga tokat tona”.
Kjo retorikë ka zbehur përpjekjet diplomatike për t’iu dhënë fund luftimeve në mes të Azerbajxhanit dhe forcave etnike armene.
Presidenti i Armenisë, Armen Sarkisian, ka vizituar së fundmi Brukselin ndërkohë që ministrat e Jashtëm të Azerbajxhanit dhe Armenisë janë në Moskë për t’u konsultuar me Rusinë.
Të dyja vendet kanë raportuar për luftime të reja më 21 tetor në Nagorno-Karabakh dhe afërsi të këtij rajoni, duke dështuar edhe armëpushimin e dytë.
Ndonëse njihet si pjesë e Azerbajxhanit me shumicë myslimane, rajoni i Nagorno-Karabakhut është kontrolluar nga armenët etnikë të krishterë, të përkrahur nga Jerevani, prej armëpushimit të vitit 1994./Insajderi.com.
