Malajzia shpalli gjendjen e jashtëzakonshme për të ndaluar përhapjen e koronavirusit të ri (COVID-19), e cila mund të zgjasë deri më një gusht, transmeton Insajderi.
Me kërkesë të Kryeministrit Muhyiddin Yassin, Mbreti i Malajzisë, Al-Sulltan Abdullah Ri’ayatuddin Al-Mustafa Billah Shah, shpalli gjendjen e jashtëzakonshme, thuhet në deklaratën e pallatit kombëtar, raporton Anadolu Agency (AA).
“Al-Sulltan Abdullah është i mendimit se përhapja e COVID-19 në vend është në një fazë kritike dhe ka nevojë për të dekretuar një shpallje të gjendjes së jashtëzakonshme”, thuhet më tej.
Vendimi u mor në përputhje me interesat kombëtare dhe sigurinë e njerëzve pasi spitalet po përballen me vështirësi në pranimin e pacientëve të rinj me COVID-19 në repartet e kujdesit intensiv, shtoi njoftimi për shtyp.
Muhyiddin tetorin e kaluar rekomandoi që monarku të shpallte gjendje të jashtëzakonshme të COVID-19, por kërkesa u refuzua.
Në një fjalim televiziv më vonë gjatë ditës, ai tha se nën gjendjen e jashtëzakonshme parlamenti do të pezullohet dhe zgjedhjet nuk do të mbahen.
Malajzia vuri nën kontroll valën e hershme të sëmundjes me një bllokim të rreptë tremujor. Por situata filloi të ndryshojë në shtator pas zgjedhjeve në shtetin Borneo të Sabah.
Muhyiddin formoi qeverinë në mars të vitit 2020 pas dorëheqjes së kryeministrit të atëhershëm Mahathir Mohamad. Ai gëzon një shumicë të ngushtë.
Vendi i Azisë Juglindore ka raportuar më shumë se 138.000 raste dhe 555 vdekje të lidhura me virusin që nga fillimi i shpërthimit. Malajzia pritet të marrë së shpejti dërgesën e parë të vaksinave nga Pfizer-BioNTech.
Autoritetet janë gjithashtu në negociata me Oxford-AstraZeneca, Rusinë, Kinën dhe iniciativën COVAX e Organizatës Botërore të Shëndetësisë (OBSH) për të siguruar doza për popullsinë e saj prej mbi 32 milionë.
Zbulohet varianti i ri COVID-19
Ndërkohë, një zyrtar malajzian i shëndetit tha se është zbuluar varianti i ri i koronavirusit, i cili u raportua për herë të parë në Mbretërinë e Bashkuar dhe thuhet se është më ngjitës.
Në një postim në Facebook, Noor Hisham Abdullah, tha se një djalë 22 vjeçar, i cili kishte histori të udhëtimeve kohëve të fundit në Mbretërinë e Bashkuar, ishte testuar pozitiv me llojin B117 COVID-19. Ai është izoluar për trajtim të mëtejshëm.
Duke thënë se nuk ka pasur transmetim shtëpiak të lidhur me variantin, ai këshilloi publikun të ruajë standarde të larta të higjienës dhe të lajë duart shpesh përveç ndjekjes së masave të tjera paraprake. /Insajderi.com
