Gjermania sot nderon afro 80.000 njerëz që kanë humbur jetën nga Coronavirusi, ndërkohë që vendi lufton me një tjetër rritje të infeksioneve, transmeton Insajderi.
Presidenti Frank-Walter Steinmeier do të drejtojë ngjarjen përkujtimore me zyrtarë të tjerë të lartë në sallën e koncerteve të Berlinit në Konzerthaus. Zyra e tij thotë se ngjarja gjithashtu u kushtohet të pikëlluarve “të cilët nuk mund të shoqëronin të afërmit e tyre pasi vdiqën dhe për të cilët nuk u lejuan rituale të rëndësishme dhe ngushëlluese të zisë”, raporton Anadolu Agency (AA).
Numri i vdekjeve të konfirmuara në Gjermani nga COVID-19 ishte 79.914 sot, me një rritje prej 67 krahasuar me një ditë më parë. Ky është numri i pestë më i lartë në Evropë, pas Britanisë, Italisë, Rusisë dhe Francës.
Gjermania kishte një numër relativisht të vogël të vdekjeve në fazën e parë të pandemisë, por regjistroi nivele shumë më të larta të infeksionit në vjeshtë dhe dimër. Në janar, më shumë se 1.000 vdekje në ditë u raportuan në vendin me 83 milionë banorë.
Infeksionet janë rritur përsëri gjatë dy muajve të fundit pas zbulimit të variantit të ri britanik më ngjitës të koronavirusit. Gjermania ka raportuar 3,14 milionë raste që nga fillimi i pandemisë.
Kancelarja Angela Merkel i bëri thirrje parlamentit të miratojë një projektligj i cili do të zbatonte mbyllje të menjëhershme në zonat ku ka më shumë se 100 raste të reja javore për 100.000 banorë. Shkalla mbarëkombëtare sot ishte 162.
Merkel thotë se plani është i nevojshëm për të parandaluar mbingarkesën e sistemit të kujdesit shëndetësor, por qeveritë e shteteve dhe të tjerët kanë gjetur gabime në aspektet e tij. /Insajderi.com
