SHBA kanë publikuar të enjten se kanë informata të besueshme se Rusia së bashku me Sirinë po punojnë për të shtyrë hyrjen e inspektorëve të Organizatës për ndalim të armëve kimike në mënyrë që t’i largojnë provat mbi përdorimin e armëve kimike në Duma.
“Kemi informata të besueshme që tregojnë se rusët po bashkëpunojnë me regjimin sirian për të pamundësuar dhe ngadalësuar qasjen e inspektorëve në Duma. Rusët bashkë me regjimin sirian punojnë në pastrimin e lokacionit të sulmit duke i larguar provat inkriminuese mbi sulmin me armë kimike”, ka deklaruar zëdhënësja e Departamentit të Shtetit Heather Nauert. Ajo ka shtuar se inspektorët ende nuk kanë arritur të hyjnë në Duma.
Inspektorët e Organizatës për ndalimin e armëve kimike kanë arritur në Damask të shtunën më 14 prill, me qëllim të hetojnë se a ka pasur sulm me armë kimike më 7 prill në Duma, qytet në afërsi të Damaskut të cilin e mbanin kryengritësit. Vendet perëndimore për këtë sulm me armë kimike e akuzuan regjimin në pushtet të Bashar al-Assad, dhe për këtë të shtunën në mëngjes SHBA, Britania e Madhe dhe Franca kanë kryer sulme ajrore në stabilimentet ku prodhohen armët kimike në Siri./Insajderi.com.
