Këshilli i Sigurimit i Kombeve të Bashkuara miratoi njëzëri sot një rezolutë që kërkon përfundimin e konflikteve në të gjithë botën, në mënyrë që të lehtësojë luftën kundër pandemisë Coronavirus, njofton Insajderi.
Rezoluta, e cila u votua me shkrim, u propozua bashkërisht nga Franca dhe Tunizia, të cilat menjëherë vlerësuan miratimin e saj.
Disa ekspertë dyshojnë se rezoluta do të zbatohet pasi ajo u propozua disa muaj më parë, dhe kjo, siç vlerësojnë ata, ka ndikuar në rënien e besueshmërisë së Këshillit të Sigurimit të KB.
Rezoluta, e cila është bllokuar për muaj me radhë nga Kina dhe Shtetet e Bashkuara për shkak të pikëpamjeve kontradiktore mbi rolin e Organizatës Botërore të Shëndetit (OBSH) të përmendur në një version të tekstit, është pjesë e mbështetjes për apelin e armëpushimit të sekretarit të përgjithshëm të KB, Antonio Guterres.
Teksti kërkon një “ndërprerje të përgjithshme dhe të menjëhershme” të konflikteve në botë, përveç konflikteve kundër grupeve xhihadiste./Insajderi.com
