![Anthony Fauci: Për imunitetin e tufës nevojitet vaksinimi i 90 përqind e popullësisë](https://insajderi.com/wp-content/uploads/2020/12/images-3-730x440.jpg)
Drejtori i Institutit Kombëtar të Sëmundjeve Alergjike dhe Infektive në Shtetet e Bashkuara të Amerikës, dr. Anthony Fauci tha se për të fituar imunitetin e tufës ndaj koronavirusit do të nevojitet vaksinimi i 90 për qind të popullsisë, transmeton Insajderi.
Fauci, një ndër mjekët e dalluar të SHBA-së, në intervistën për “New York Times” tha se më parë imuniteti i tufës ka qenë në nivelin 70-75 për qind, por aq sa është ngjitëse sëmundja aq duhet të jetë i lartë niveli i vaksinimit.
“Nuk e dimë numrin e saktë, por mendoj se është mes 70 dhe 90 për qind”, u shpreh ai.
Qendrat për Kontrollin dhe Parandalimin e Sëmundjeve (CDC) njoftuan se deri më tani mbi 1 milion persona në vend janë vaksinuar kundër COVID-19.
Nga vaksinat Pfizer/BioNTech dhe Moderna që janë aprovuar në SHBA duhet të zbatohen nga dy doza.
Ndërkohë, administrata e Trumpit synonte vaksinimin e dozës së parë të 20 milionë amerikanëve.
Sipas të dhënave të “Worldometers” mbi 19 milionë persona në SHBA janë infektuar me COVID-19 ndërsa kanë humbur jetën mbi 336 mijë të tjerë. /Insajderi.com