Presidenti i SHBA-së, Joe Biden ka anuluar fondet e siguruara nga buxheti i mbrojtjes për murin e ndërtuar në kufirin meksikan për të penguar kalimin e emigrantëve dhe se një pjesë të fondeve do të përdoren në luftën kundër dëmeve të mjedisit që ka shkaktuar muri, transmeton Insajderi.
Një zyrtar nga administrata e Bidenit, në një deklaratë për gazetarët informoi për anulimin e fondeve të siguruara nga buxheti i mbrojtjes për projektet e murit në kufirin me Meksikën ndërtimi i të cilit ka filluar në periudhën e presidentit të mëparshëm Donald Trump, raporton Anadolu Agency (AA).
“Me vendimin e Bidenit tashmë asnjë fond (vlerë monetare) nuk do të përdoret në ndërtimin e murit kufitar. Departamenti i Mbrojtjes që nga sot do të anulojë të gjitha projektet e murit ku përdoren fonde të drejtuara”, tha zyrtari duke bërë të ditur se një pjesë e fondeve në fjalë do të përdoren në parandalimin e dëmeve të mjedisit që ka shkaktuar muri.
Ndërprerja e fondeve federale të siguruara për murin e ndërtuar në kufirin me Meksikën ka qenë një prej dekreteve të presidenti amerikan Joe Biden që nënshkroi kur erdhi në detyrë më 20 janar 2021. /Insajderi.com
