Gruaja e re luftoi për 20 sekonda me kriminelin dhe arriti të mbrohet prej sulmeve me thikë, derisa policia ende e kërkon kryesin.
Një grua e re, të premten mbrëma u sulmua me thikë në afërsi të një kompleksi banesor në Dublin. Sulmi brutal në kryeqytetin irlandez ndodhi kur një mashkull i paidentifikuar iu afrua nga prapa, e kapi për dore dhe tentoi t’ia vjedhë çantën, shkruan Daily Mail.
Viktima i bëri rezistencë, por ai vazhdonte ta therte me thikë, duke i shkaktuar shumë plagë nëpër duar dhe këmbë para se të arratisej.
Për t’i paralajmëruar edhe gratë tjera për kriminelin i cili ende shëtit lirshëm nëpër rrugë, ajo e publikoi në Facebook eksperiencën e saj:
“Ju lutem, dua të mbetem anonime. Mbrëmë rreth orës 10 jam sulmuar afër derës së hyrjes në kompleksin e banesave Millpark, në adresë Old Nangor Road. Sulmuesi ishte një djalë i ri (16-20 vjeç), i dobët, me lëkurë të zbehtë dhe flokë të kuqe. E kishte veshur një bluzë të gjelbër me kapele, veshje sporti dhe atlete. Deshi të ma grabiste çantën, dhe e kishte një thikë të mprehtë me të cilën shumë herë më lëndoi nëpër duar dhe këmbë. Po i paralajmëroj të gjitha gratë që të mos ecin vetëm sepse ai mund të sulmoj përsëri. Ende nuk e kanë kapur”, shkruan në status.
Policia ende po e heton këtë rast dhe për momentin askush nuk është arrestuar, ndërsa gruas fatkeqe iu dha ndihma në spital, plagët e së cilës nuk ishin të rrezikshme për jetë./Insajderi.com.
https://www.youtube.com/watch?time_continue=23&v=U0ZVZjDTx0o
