Të gjithë sytë sonte mbrëma do të jenë kah Stambolli, aty ku dy gjigantët anglezë, Liverpooli e Chelsea takohen në ndeshjen e vlefshme për Superkupën e Evropës.
Dy skuadrat sot do të përballen në stadiumin e ekipit të Besiktasit – ‘Vodafone Park’ në Stamboll, për trofeun e parë të sezonit, shkruan Insporti
Liverpooli vjen në këtë ndeshje si fituesi i Ligës së Kampionëve, kurse Chelsea si fituese e Ligës së Evropës.
Që të dy finalet e kupave evropiane këtë vit ishin të gjitha angleze – Liverpooli mundi Tottenhamin kurse Chelsea mposhti Arsenalin.
Ekipi i Jurgen Kloppit vjen me një formë dukshëm më të mirë, pasi në ndeshjen hapëse të Premierligës shkatërroi 4:1 Norwich Cityn. Krejtësisht ndryshe është atmosfera te skuadra e Frank Lampardit, që në fundjavë u mposht 4:0 nga rivali Manchester Unitedi.
Por si do të rreshtohen ekipet në ndeshjen e sotme?
Mediat në ishull kanë publikuar përbërjet e mundshme të të dyja skuadrave, transmeton Insporti
Formacioni i mundshëm i Liverpoolit
Në mungesë të të lënduarit Alisson Becker, spanjolli Adrian do të jetë portieri titullar te Liverpooli.
Treshja e sulmit ndërkaq, do të përbëhet nga Mohamed Salah, Roberto Firmino e Sadio Mane, që pritet t’i shkaktojë shumë probleme Chelseat.
Nuk pritet që Xherdan Shaqiri të luajë titullar, i cili në ndeshjen ndaj Norwichit startoi në bankë dhe trajneri Klopp nuk e futi fare në lojë.
Shaqiri duke u stërvitur në prag të ndeshjes në Superkupë
Për Shaqirin, kjo do të jetë hera e dytë në karrierë që në Superkupën e Evropës ballafaqohet me Chelsean.
Ai ishte pjesë e Bayern Munichut në vitin 2013 – kur me ekipin e Guardiolas kishte triumfuar ndaj Chelseat të Mourinhos me penallti.
‘Shaqa’ kishte shënuar penalltinë e fundit për Bayern Munichun, që kishte fituar 5:4 pas 11-metërshave, pasi ndeshja pas vazhdimeve kishte përfunduar me rezultat 2:2. Huqja e penalltisë vendimtare nga Romelu Lukaku, kishte bërë që Shaqiri me Bayern Munichun ta fitonin Superkupën e Evropës.
Por as në atë ndeshje, Shaqiri nuk kishte qenë titullar. Ai ishte futur në lojë në minutën e 96′ të vazhdimeve, në vend të Arjen Robbenit.
Formacioni i mundshëm i Chelseat
Chelsea, që e ka vuajtur ndëshkimin e FIFA-s për dy afate kalimtare, nuk është përforcuar dhe do të ketë përbërje pothuajse të njëjtë me atë të vitit të kaluar, përveç amerikanit Christian Pulisic që u transferua në janar dhe rikthimit të Kurt Zoumas.
Sidoqoftë, risia më e madhe te ‘blutë’ është rikthimi i legjendës Frank Lampard, në rolin e trajnerit. Me të marrë drejtimin e skuadrës, ndikimi i Lampardit ka filluar të vërehet: ai te Chelsea ka sjellur një frymë të re dhe në ekipin e parë ka inkuadruar disa lojtarë nga akademia.
Në ndeshjen ndaj Manchester Unitedit, titullarë ishin dy të rinjtë, Mason Mount e Tammy Abraham, por sipas parashikimeve ata mund të lihen në bankë për këtë ndeshje.
Mount – njëri nga të preferuarit e Lampardit edhe vitin e kaluar te Derby, mund të mos e nis titullar pasi që në vend të tij pritet të luajë 20-vjeçari tjetër Pulisic.
Në qendër të sulmit po ashtu pritet të startojë Olivier Giroud, i mbështetur edhe nga Pedro.
Në dyshim është N’Golo Kante, që nëse luan titullar do të jetë një mbështetje e madhe për ekipin e Lampardit. /Insporti.com/