Franca do të shfuqizojë detyrimin për mbajtje të maskës në ambiente të jashtme dhe do të heqë orën policore, si masë për frenimin e Coronavirusit, trasmeton Insajderi.
Zyrtarë nga ky vend kanë bërë të ditur se vendimi për maskën vlen nga dita e premte, ndërsa për orën policore nga e diela.
Kryeministri francez, Jean Castex ka thënë se situata në Francë është duke u përmirësuar shumë më shpejt sesa pritej dhe se francezët janë duke përjetuar “një kthim në jetën normale”.
Castex deklaroi se është “lajm shumë i mire” që ora policore do të hiqet 10 ditë më herët sesa planifikohej. Veshja e maskës do të mbetet e detyrueshme vetëm në vende të mbushura me njerëz, të tilla si tregjet në rrugë dhe stadiumet, theksoi ai.
Franca, javëve të fundit, është duke regjistruar mesatarisht tre mijë e 900 raste me Coronavirus në ditë.
Franca ka regjistruar gjithsej 110 mijë e 563 viktima nga Coronavirusi – një nga shifrat më të larta në Evropë./Insajderi.com
