Një burrë italian u bë i diplomuari më i vjetër i kombit pasi kaloi provimet e tij të fundit në moshën 96 vjeçare, njoftoi Reuters, transmeton Injsaderi.
Veterani i Luftës së Dytë Botërore Giuseppe Paterno mori diplomën e tij universitare në histori dhe filozofi nga Universiteti i Palermo-s.
“Unë jam një person normal, si shumë të tjerë”, tha Paterno në një intervistë për Reuters. “Për sa i përket moshës, unë kam kapërcyer të gjithë të tjerët, por kjo nuk është arsyeja pse e bëra këtë”.
Në vitin 2017, Paterno vendosi të regjistrohej dhe më në fund të merrte diplomën e tij. Ai e përfundoi punën e tij me një makinë shkrimi nga vitet ’80, duke përdorur botime të shtypura të librave në vend të Internetit për të përfunduar kërkimin e tij.
Lindur në një familje të varfër në Siçili para Depresionit të Madh, Paterno iu bashkua marinës dhe shërbeu në Luftën e Dytë Botërore.
Ai duhej të priste derisa pas luftës të mbaronte shkollën e mesme, duke përfunduar shkollën në moshën 31 vjeçare. Ai vazhdoi të punojë në hekurudha ndërsa u martua dhe rriti një familje.
Pasi mbijetoi në varfërinë e fëmijërisë, luftën dhe – tani – pandeminë, ai përfundoi ceremoninë e diplomimit para familjes dhe mësuesve, si dhe para studentëve 70 vjet më të rinj se ai, raportoi Reuters. /Insajderi.com
