Luftanija John S McCain, e specializuar në gjuetinë e nëndetëseve, po vepronte në Detin e Japonisë (i njohur gjithashtu si Deti i Lindjes), pranë kryeqytetit rus të Lindjes së Largët, Vladivostok, transmeton Insajderi.
Autoritetet thanë se mjeti detar kishte hyrë rreth 2 kilometra brenda ujërave të njohura ndërkombëtarisht si të Rusisë.
Moska tha se luftanija ishte paralajmëruar për shkelje të territorit nga luftanija ruse Admiral Vinogradov, e cila ishte vendosur prapa saj.
Në komunikatë detarët paralajmëronin se do të detyroheshin të “përplasnin me forcë shkelësin për ta nxjerrë nga territori.”
Marina e SHBA nuk ka komentuar mbi incidentin.
Kjo nuk është hera e parë që luftanija John McCain është përfshirë në incidente detare.
Në 2017, dhjetë detarë amerikanë vdiqën kur ajo u përplas me një cisternë me flamur të Liberisë, çka shkaktoi rrjedhje dhe e nxori mjetin nga shërbimi deri në tetor 2019.
Hetimet mbi incidentin paralajmëronin për një sistem mjaft të komplikuar kontrolli me ekran me prekje për të komanduar forcën e shtytjes së motorëve, si dhe mungesë trajnimi të ekuipazhit. /Insajderi.com
