Sindikata e Pavarur e Sektorit Privat të Kosovës në një konferencë për media, ka shfaqur pakënaqësi me situatën që gjendet sektori privat. Ata kanë kërkuar që paga minimale të jetë 350 euro.
Gjendja cilësohet të jetë përkeqësuar edhe më shumë gjatë pandemisë, njofton Insajderi
Kryetari i Sindikatës, Jusuf Azemi, ka theksuar se janë bërë keqpërdorime të pakos emergjente për pagesat 170 euro të punëtorëve.
Azemi ka kërkuar nga Qeveria e Kosovës t’u ekzekutohen pagesat të gjithë punëtorëve të sektorit privat si dhe punëtorët teknikë dhe sigurimi fizik në spitale.
Në të kundërtën, kryetari i Sindikatës ka paralajmëruar se sektori privat do të ngritët në protesta apo edhe do ta bllokojnë totalisht punën.
“Janë bërë keqpërdorime në shpërndarjen e mjeteve. Janë bërë gabime në aplikim nga punëtorët. Ne kërkojmë që të gjithë punëtorët teknik nëpër spitale të hyjnë ne pakon e kompensimit për 300 euro sepse përndryshe do të fillojmë me protesta ose do ta bllokojmë totalisht punën”, ka thënë Azemi, raporton koha.net.
Gjithashtu, sindikata ka kërkuar nga Qeveria rritjen e menjëhershme të pagës minimale në Kosovë.
“Sindikata për një kohë të shkurtër dëshiron që paga minimale të ngritët në 350 euro sipas kalkulimeve që i kemi bërë. Nëse ekziston një qeveri është marre që paga minimale të jetë 130-170 euro. Është diskriminim dhe skllavërim”, ka shtuar kryetari i Sindikatës. /Insajderi.com
