Kosova në secilën ndeshje po hyn me shpresën për ta shënuar fitoren e parë, por në fakt secilën herë dështimet po janë më të mëdha. Barazimin ndaj Finlandës vazhdojnë ta mbajnë në mend “Dardanët”, të cilët pastaj u mposhtën keq pesë herë rresht.
Paraqitjet e mira të kohëpaskohshme dhe statistikat mbresëlënëse të Albert Bunjakit nuk po zënë vend në tabelën që pasqyron forcën reale të çdo ekipi. Dhe, në realitet Kosova nuk i ka punët aspak mirë.
Statistika më të dobëta sesa Kosova ka vetëm San Marino, Lihtenshtajni, Gjibraltari dhe Malta
Kosova ishte bërë lajm botëror kur ishte pranuar në UEFA dhe në FIFA e po ashtu jehonë kishte bërë edhe debutimi i saj në kampanjën kualifikuese të kampionatit botëror “Rusia 2018”, shkruan sot gazeta Zëri.
Madje, Përfaqësuesja kosovare qysh me paraqitjen e parë kishte tërhequr vëmendje të madhe ndërkombëtare, pasi kishte prodhuar befasi të këndshme.
Një shtet i vogël, i dal nga izolimi 25-vjeçar, i posapranuar në UEFA dhe në FIFA qysh në ndeshjen e parë të tij në një kampanjë kualifikuese arriti të fitojë pikë.
Ekipi i Albert Bunjakit e kishte “tronditur” si mysafir Finlandën me përvojë të madhe, ndaj së cilës e kishte regjistruar një barazim të vlefshëm prej 1:1.
Njëherësh, qyteti finlandez, Turku, mbetet përvoja më e mirë e kosovarëve në këtë kampanjë eliminatore, gjatë së cilës pastaj përjetoi goditje të njëpasnjëshme.
Pas barazimit me finlandezët, Kosova i zhvilloi edhe pesë ndeshje të tjera. Në secilën hyri për të fituar, por nga secili kundërshtar pësoi “tmerrin”.
Kosova u mposht si vendase nga Kroacia 0:6, humbi si mysafire e Ukrainës me rezultat 3:0. Ekipi i Bunjakit vazhdoi të mos shënojë gol as si mysafire e Turqisë, prej së cilës kishte humbur 2:0.
Goli erdhi në Shkodër ndaj Islandës, por bashkë me golin e shumëpritur erdhi edhe humbja prej 1:2. Kurse, humbjen e pestë rresht Kosova e pësoi të dielën sërish nga Turqia, por si vendase, edhe atë me rezultat të thellë, 4:1.
Pavarësisht humbjeve të vazhdueshme e të thella, Kosova kohë pas kohe ka luajtur shumë mirë, por goxha shpesh edhe fati nuk ka qenë pothuajse kurrë në anën e saj.
Kjo duket të ketë ndikuar që edhe Bunjaki dhe ekipi i tij t’u shpëtonin kritikave të ashpra në Prishtinë.
Madje, kur Bunjaki përmend statistika të ndryshme, ato dinë ta qesin Kosovën edhe mbi Kroacinë apo Turqinë.
Por, për fatin e keq të Bunjakit dhe gjithë “Dardanëve” ato nuk vlejnë në një tabelë klasifikimi, e cila e pasqyron forcën e vërtetë të një ekipi.
Dhe, tabela flet keq për Kosovën. Përfaqësuesja jonë është e gjashta në Grupin I me vetëm një pikë. Nëse Kosova krahasohet me ekipet tjera që aktualisht janë të fundit në nëntë grupe të tjera, atëherë veç San Marino, Lihtenshtajni, Gjibraltari dhe Malta i kanë punët më keq sesa Kosova.
Ato ende nuk e kanë fituar nga asnjë pikë prej nga gjashtë ndeshje sa i kanë zhvilluar. Në nivel me Kosovën duket Luksemburgu, i cili po ashtu deri më tani e ka fituar veç një pikë e që është i fundit në Grupin A.
Më mirë se Kosova i kanë punët Moldavia e Kazakistani që kanë nga dy pikë, kurse Lituania është e fundit në Grupin B me tri.
Kosova i ka punët keq edhe me goldallim. Ekipi i Bunjakit në gjashtë ndeshje i ka shënuar vetëm 3 gola, kurse i ka pësuar 18 sosh.
San Marino i ka më keq punët edhe në këtë aspekt, pasi e ka shënuar 1 gol dhe i ka pësuar gjithsej 30.
Edhe Lihtenshtajni i ka më keq punët sesa “Dardanët”, pasi deri më tash e ka realizuar 1 gol dhe i ka pranuar 24. 24 i ka pësuar edhe Gjibraltari, i cili i ka shënuar tre gola.
