Një polic në stadiumin "Shahin Haxhiislami" në Pejë e arrestoi Liridon Lecin për shkak se skuadra e tij, Prishtina i shënoi dy gola Besës së Pejës. Siç tregon futbollisti i Prishtinës, polici që e arrestoi i kishte thënë atij se "do të qëndrosh dy ditë në burg, për dy golat e shënuar".
Futbollisti i Prishtinës, Liridon Leci ka thënë se polici që e arrestoi atë të dielën në stadiumin “Shahin Haxhiislami” të Pejës, i kishte thënë se arsye për arrestimin ishin dy golat e shënuar të skuadrës së tij ndaj Besës.
“Më arreston një polic që nuk i din rregullat dhe më thotë se i keni shënuar dy gola dhe dy ditë do të qëndrosh i mbyllur”, ka deklaruar Leci.
Leci u lirua sot nga Qendra e Paraburgimit në Pejë, pasi u mbajt aty për 48 orë pas arrestimit, raporton Insajderi.
Në një intervistë me faqen zyrtare të klubit të FC Prishtinës, mbrojtësi ka rrëfyer bisedën me policin që e arrestoi. Leci tregoi se polici i kishte thënë atij se do të mbahej dy ditë në paraburgim, për këta dy gola që shënoi skuadra e tij ndaj Besës, raporton Insajderi.
“Pjesa tjetër e policisë dhe Majori i stacionit duke më kërkuar falje më ka thënë se kam drejt të qoj qështjen në të gjitha instancat dhe është turp për institucionin e policisë se çka ka ndodh”, ka thënë Liridon Leci.
Leci tashmë pritet të jetë i gatshëm për ndeshjen e radhës që Prishtina do ta zhvillojë gjatë kësaj fundjave. /Insajderi.com
