FC Prishtina ka prezantuar futbollistin e Kombëtares së Kosovës, Max Rugovën.
Sulmuesi 19-vjeçar është prezantuar sot te klubi më i trofeshëm kosovar, duke treguar se është i lumtur me këtë lëvizje të tij.
“Max Rugova është i biri i Edmond Rugovës, ish-golgeteri i Prishtinës, drejtor i klubit dhe seleksionues i Kosovës. I lindur në Kansas të SHBA më 17.02.2000, 188 cm i gjatë, sulmuesi i krahut dhe i qendrës ka luajtur në Sporting Kansas City dhe në U19 të Nurnberg më 2018/19 duke zhvilluar 16 ndeshje duke shënuar 1 gol. Max ka qenë i grumbulluar edhe me U19 të Kosovës”, thotë FC Prishtina në njoftim.
Prishtina tutje shkruan se Rugova mund të jetë e ardhme e ndritur e klubit të babait të tij, duhet durim, përkushtim dhe punë maksimale që një ditë, të paktën, të përsëris suksesin e babait.
“Jam shumë krenar që do të jem pjesë e Prishtinës. Gjithmonë kam pasur dëshirë të jem në Prishtinë, sepse e di historinë e klubit ku ka luajtur babai im dhe e përsëris, kjo më bën krenar. Nuk dua të flas shumë për vete, megjithëse mendoj se jam shumë kreativ, duke e dashuruar driblimin dhe dëshirën, sidomos për asiste”, u shpreh ai.
“Ka disa ditë jam me skuadrën, e njoh tani më ekipin, ka një trajner të respektueshëm dhe kam krijuar besimin se ky ekip mund ta fitojë titullin dhe shpresoj shumë të mposhtë edhe konkurrencën e madhe brenda skuadrës që edhe unë të mund të kontribuoj për suksesin e ekipit”, ka thënë Max Rugova.
Rugova së fundmi ishte pjesë e Nurnergut U19, si dhe është pjesë e Kombëtares U19 të Kosovës.
Babai i tij, Edmond Rugova, ka qenë edhe trajner i Kombëtares së Kosovës në futboll, në periudhën 2006-2009.
