Mërgim Vojvoda është një nga emrat shqiptar që iu bashkua Serisë A këtë sezon. Mbrojtësi anësor po zhvillon një kampionat të mirë me Torinon, me të cilët shënoi edhe golin e parë në elitën e futbollit italian, njofton Insajderi.
Menaxheri i tij, Adrian Aliaj, ka dhënë një intervistë për “Calciohellas”, ku shprehet i kënaqur me paraqitjet e zhvilluara nga Vojvoda, si dhe zbulon emrat e dy klubeve që ishin në bisedime përpara se të zgjidhnin Torinon si destinacionin e tyre.
“Vojvoda arriti në Torino kur ndarja kishte filluar tashmë me Giampaolo, por unë jam i kënaqur me vitin e tij të parë në Serie A. Vojvoda është një djalë fantastik dhe një profesionist i shkëlqyeshëm që mësoi italisht në 2-3 muaj dhe tashmë është titullar, tani ai gjithashtu ka shënuar një gol shumë të rëndësishëm për shpëtimin. Ai është i lumtur në Torino, e vetmja gjë që i mungon janë tifozët në tribuna sepse ende nuk ka qenë në gjendje të ndiejë atmosferën e futbollit italian. Klubet që e kërkonin? Unë kisha folur për këtë me Atalanta dhe Verona, por në fund të fundit ne zgjodhëm Torinon dhe ne jemi të lumtur”, ka thënë Adrian Aliaj. /Insajderi.com
