Mijëra kundërshtarë të kryeministrit të Nepalit, Khadga Prasad Sharma Oli, marshuan nëpër rrugët e kryeqytetit Kathmandu duke e nxitur atë të kthente vendimin e tij për të shpërndarë Parlamentin dhe për të bërë thirrje për zgjedhje të parakohshme, transmeton Insajderi.
Duke sfiduar kufizimet e koronavirusit në mbledhje, protestuesit e quajtën vendimin e Oli jokushtetues ndërsa po mblidheshin të martën jashtë zyrës së tij në kryeqytet, raporton Al Jazeera.
Më 20 dhjetor, zyra e Presidentit Bidhya Devi Bhandari njoftoi shpërbërjen e Parlamentit me kërkesë të kabinetit Oli, ndërsa parashikoi gjithashtu zgjedhjet e përgjithshme të planifikuara tani për 30 prill dhe 10 maj, më shumë se një vit para afatit.
Protestuesit brohorisnin parulla kundër Oli ndërsa ata marshuan paqësisht në qendër të Kathmandu ndërsa mijëra policë të trazirave mbanin një vëzhgim të ngushtë. “Ne jemi duke protestuar ndaj lëvizjes antikushtetuese nga kryeministri dhe ne do të vazhdojmë të protestojmë derisa Parlamenti të rikthehet në vend”, tha Laxman Lamsal, një anëtar i asamblesë rajonale.
Oli, 68 vjeçar u bë kryeministër pasi Partia Komuniste e Nepalit (NCP) fitoi zgjedhjet tre vjet më parë. Partia e Oli dhe partia e ish rebelëve Maoist ishin bashkuar për të formuar një parti të unifikuar Komuniste. /Insajderi.com
