Udhëheqës botërorë dhe zyrtarë të tjerë nga 170 vende kanë nënshkruar Marrëveshjen e Parisit për Klimën.
Presidenti i Francës, Francois Hollande, ka qenë lideri i parë që ka nënshkruar dokumentin në një ceremoni të organizuar nga sekretari i përgjithshëm i Kombeve të Bashkuara, Ban Ki-moon, në selinë e OKB-së në Nju Jork.
Marrëveshja, teksti i së cilës është miratuar nga afro 200 vende në muajin dhjetor, synon të zbusë ndikimet e ndryshimeve klimatike dhe të mbajë rritjen e temperaturës mesatare globale nën 2 gradë Celsius.
Marrëveshja do të hyjë në fuqi 30 ditë pasi 55 vende, që llogaritet se shkaktojnë së paku 55 përqind të emetimeve të gazrave serrë, të përfundojnë procesin e ratifikimit./REL
