Dy vite më parë Neymar deklaroi se i kishte kërkuar drejtuesve të PSG-së të lejonin transferimin e tij tek Barcelona. Braziliani e shprehu hapur dëshirën e tij për të luajtur me ish shokun e skuadrës, Lionel Messi. Megjithatë, kjo histori është lënë pas dhe tashmë Neymar është mjaft i lumtur tek klubi parizien, njofton Insajderi.
Ditën e sotme, sulmuesi ka rinovuar kontratën me PSG-në deri në vitin 2025. Pas nënshkrimit të marrëveshjes Neymar është shprehur mjaft i lumtur për këtë rinovim. “Është një kënaqësi e madhe të vazhdoj aventurën me PSG, pasi jam shumë i lumtur në Paris. Është një krenari e vërtetë të jesh pjesë e kësaj skuadre. Këtu jam rritur si person, si njeri dhe si lojtar”, është shprehur Neymar.
Të dyja palët do të bëjnë të pamundurën që ta sjellin trofeun e Uefa Champions League në Paris. Pavarësisht milionave të shpenzuar në transferimin e lojtarëve, duket se Lille do të shpallet kampione e Francës këtë sezon. /Insajderi.com
