Dikush ka bërë polemika, të tjerë janë larguar për shkak se nuk kanë pasur hapësira, por me një të përbashkët: nuk kanë respektuar zgjedhjen e trajnerit kuqezi.
Në pesë vite drejtim të Kombëtares shqiptare nga Gianni De Biasi, janë jo të paktë lojtarët që kanë pasur mosmarrëveshje dhe për një arsye apo një tjetër nuk janë përfshirë më në skuadër.
Gjithçka nisi nga portieri Samir Ujkani. Ky i fundit luajti titullar ndaj Islandës në humbjen 2-1 në Reikjavik, katër vite më parë, por De Biasi i besoi më pas Etrit Berishës. Nga ky moment, Ujkani zgjodhi të largohej, duke polemizuar me De Biasin. Tashmë portieri është kapiten i Kosovës.
Ndërkohë, një tjetër futbollist që nuk gjeti hapësira në epokën e italianit ishte Kristi Vangjeli. Nga një titullar i padiskutueshëm në mbrojtje, korçari u shpërfill nga De Biazi për shkak të një mosmarrëveshjeje në një prej seancave stërvitore.
Një çështje që prodhoi polemika ishte edhe ajo e fantazistit Alban Meha. Fillimisht kosovari ishte titullar me De Biasin, por pas lënies në stol, lindi një konflikt dhe trajneri nuk e përtypi faktin që fantazisti i kërkoi llogari për mosaktivizimin. Nuk e grumbulloi më, derisa Meha zgjodhi të largohej te Kosova.
E njëjta gjë edhe me mesfushorin Valdet Rama, i cili gjithashtu zgjodhi Kosovën në momentin që De Biasi i mbylli derën.
Disi më ndryshe qëndron çështja e tre lojtarëve të lënë jashtë Europianit, si Herolind Shala, Amir Rrahmani dhe Milot Rashica. Edhe pse ishin në planet e De Biasit për eliminatoret e Botërorit, vendosën të lënë Shqipërinë për Kosovën.
Ndërsa Ergys Kaçe dhe Shkëlzen Gashi janë çështjet e muajve të fundit, me lojtarët që nuk po grumbullohen. Deklaratat e të parit nuk i kanë pëlqyer trajnerit, ndërsa i dyti po shijon suksesin në Amerikë.
Së fundmi, tekniku italian ka “krisur” marrëdhëniet edhe me kapitenin e Baselit, Taulant Xhaka. Mesfushori prishtinas është larguar nga kombëtarja për ndeshjen miqësore ndaj Bosnjës që do të luhet të martën e 28 marsit.
Sipas Xhakës, arsyeja e largimit ka qenë mos aktivizimi në ndeshjen kualifikuese të Botërorit “Rusia 2018” ndaj Italisë. /Panorama-sport.com
